VOV4.Jarai - Rơwang hrơi tơjuh rơgao, tơring čar Lâm Đồng hơmâo pơphun jơnum tong krah thun, kiăng ĕp hơdră pơsir hĭ hơdôm tơlơi aka ƀu dưi ngă, tơlơi dŏ tơnap, pơtrut bơwih ƀong huă - mơnuih mơnam 6 blan rơnuč thun 2022. Amăng anun, tơring čar pok pơhai klă Jơlan hơdră dêh čar ta man pơdong plơi pla phrâo, pơhrŏ trun hơđong kơjăp mrô sang anŏ rin, pơlir hăng pơđĭ kyar kual mơnuih ƀon sang djuai ƀiă hăng čư̆ siăng, biă ñu mă wai lăng, tuh pơ plai tŭ yua hơdôm mrô prăk phrâo hơmâo Khua mua pơ ala mơnuih ƀon sang dêh čar, kơnuk kơna ta pơpha brơi.

Tui hăng tơlơi lăi pơthâo glăi ƀơi mông jơnum lok 6 Jơnum min pơ ala mơnuih ƀon sang tơring čar Lâm Đồng (tal 10), 6 blan akŏ thun 2022, bơwih ƀong huă - mơnuih mơnam mơng tơring čar hơmâo lu tơlơi dưi ngă lăp hơdor biă mă. Amăng anun, hmư̆ hing hloh lĕ bơwih ƀong huă đĭ 9,29%; prăk pơhrui glăi kơ kơnuk kơna hơmâo 7.800 klai prăk, dưm dưm hăng 71,5% mrô jŭ hlâo mơng tơring čar laih anun đĭ rơbêh 22% pơhmu hăng tơđar hlâo. Prăk sĭ mơdrô hăng čar rơngiao ăt hơmâo rơbêh 436 klăk dolar Mi, đĭ 43%; tuai čuă ngui hơmâo rơbêh 3,7 klăk wơ̆t čô, đĭ 86,5% pơhmu hăng tơđar thun 2021. Hơdôm bruă djru tơlơi hơdip mơda mơnuih ƀon sang, pơhrŏ trun sang anŏ rin, rơnuk rơnua kơđi čar hăng hơđong kơjăp plơi pla hơmâo pơhlôm mơn.

Mông jơnum lok 6 Jơnum min pơ ala mơnuih ƀon sang tơring čar Lâm Đồng.

Rơngiao kơ hơdôm tơlơi dưi ngă, tơring čar Lâm Đồng ăt bưp mơn lu tơlơi tơnap tap, biă ñu hăng bruă wai lăng glai rưng, wai lăng pơtâo čuah, lŏn tơnah, čuk pơkra anih anom...Pơhiăp ƀơi mông pơphun jơnum, ơi Trần Đức Quận, Ding kơna Khul apăn bruă git gai Ping gah, Khua git gai Ping gah tơring čar, Khua Jơnum min pơ ala mơnuih ƀon sang tơring čar Lâm Đồng lăi, anai jing tơlơi dŏ đom kiăng bơkơtuai, ĕp jơlan pơsir hĭ, pơtrut pơđĭ kyar bơwih ƀong huă - mơnuih mơnam pơđĭ kyar. Ơi Trần Đức Quận lăi:

“Ƀơi mông jơnum anai, ƀing khua pơ ala mơnuih ƀon sang tơring čar pơƀut kơsem min rơđah rim tơlơi hơmâo bơkơtuai, pơblang rơđah, črâo rơđah phun tơhnal hơdôm tơlơi ta dưi ngă ăt kah hăng aka ƀu dưi ngă, hơmâo jơlan pơsir hĭ hơdôm tơlơi dŏ gun amăng bruă pơđĭ kyar bơwih ƀong huă - mơnuih mơnam, pơhlôm rơnuk rơnua kơđi čar hăng hơđong kơjăp plơi pla”.

Ƀơi mông tơña hăng lăi glăi tơlơi tơña, khua mua tơring čar Lâm Đồng pơsit yua wai lăng dŏ tơdu lŏn pioh pơkra jơlan jing ba truh lu tơlơi ƀu klă. Amăng anun, plơi prong Bảo Lộc hăng tơring glông Bảo Lâm hơmâo lăng jing anih hmư̆ hing hloh kơ bruă pơpha brơi lŏn pơkra jơlan nao rai, tơdơi kơ kăng hĭ jing hơdôm blah lŏn ƀơi tơring čar Lâm Đồng. Tui hăng mrô jŭ yap aka ƀu djŏp mơng anom gơgrong bruă anai, hơmâo ƀiă biă mă ñu 50 ektar lŏn mơng giăm 200 boh sang anŏ hơmâo pơpha brơi kơnuk kơna ta, amăng anun hơmâo pô kăng pơpha brơi truh 10 ektar. Tơlơi ƀing ta kiăng lăi nao, tơdơi kơ pơpha brơi lŏn kơ Kơnuk kơna, mơnuih ƀon sang tŭ kơ pơkra jơlan mă pô, tuh bê tông hơmâo ia mơtuir, laih anun pơtruh nao rai hăng hơdôm črăn jơlan nao rai pơkŏn amăng kual.

Ơi Trần Văn Hiệp, Khua jơnum min mơnuih ƀon sang tơring čar Lâm Đồng lăi, bruă mơnuih ƀon sang pơpha brơi lŏn ngă jơlan lĕ yua kiăng klă kơ pô ñu đôč, đah mơng dưi kăng, pơčlah hĭ mrô lŏn brơi pô pơkŏn dong djă anăn tui tơlơi phiăn. Lu tơring čar, plơi prong lêng ƀu ngă hră pơ-ar tŭ mă, wai lăng đơ đam lŏn hơmâo pơpha, lơ̆m anun mrô lŏn anai tơdơi kơ hơmâo hră pơsit mă glăi lĕ yua kơnuk kơna ta laih wai lăng. Kiăng mơnuih ƀon sang, hơdôm boh sang anŏ, pô hlong či pơkra mă jơlan ƀu djơ̆ hăng bruă prăp lui hlâo, laih anun ƀu djơ̆ tơlơi phiăn, wơ̆t hăng bruă kăng pơpha lŏn, pơjing mă anih plơi pla dŏ giong anun ba sĭ. Ơi Trần Văn Hiệp lăi:

“Bruă pơpha brơi lŏn ngă jơlan nao rai phrâo sit biă ñu lĕ anŏ pơdong plơi pla phrâo kiăng ngă pơhưč ƀing hyu mơdrô lŏn tơnah đôč. Jơnum min mơnuih ƀon sang tơring glông Bảo Lâm, plơi prong Bảo Lộc brơi hơdôm boh sang anŏ, hơjăn pô pơplih tơlơi dưi mă yua lŏn, mơng lŏn ngă hmua jing lŏn dŏ mơ̆ aka ƀu pơhlôm hơdôm hơnong pơkă, bruă dưm dăp bơdjơ̆ nao. Jing ba truh lu tơlơi ƀu gêh gal amăng bruă wai lăng lŏn tơnah, man pơdong ƀơi tơring, ngă mơnuih ƀon sang ră ruai djơ̆, bơbeč kơ tơlơi đăo gơnang, tơlơi hmư̆ hing hiam mơng tơring čar Lâm Đồng. Tơring čar hơmâo laih hră git gai hơdôm anom bruă, hơdôm boh tơring ngă tui djơ̆ tơlơi phiăn kăng pơpha lŏn phrâo pơtrun akŏ blan 7. Pơhlôm brơi klă kơ mơnuih ƀon sang, anom bơwih ƀong samơ̆ ăt khŏm gơgrong bruă prăk kăk hăng Kơnuk kơna mơn”.

Wai lăng ƀu kơjăp lŏn arăng pơpha pioh pơkra jơlan jing ba truh lu tơlơi ƀu klă

Hluai tui bruă pơtŏng glăi hơdôm tơlơi dưi ngă amăng bruă bơwih ƀong huă - mơnuih mơnam 6 blan akŏ thun 2022, laih anun him lăng hlâo amăng hrơi blan pơ anăp; Jơnum min pơ ala mơnuih ƀon sang tơring čar Lâm Đồng tŭ ư hơdră pơđĭ kyar bơwih ƀong huă - mơnuih mơnam 6 blan rơnuč thun 2022, gir ngă giong rơgao hnong hơdôm bruă mơ̆ Jơnum min mơnuih ƀon sang tơring čar jao; laih dong lăi nao hơdôm hơdră pơsir kiăng pơƀut ngă amăng hrơi blan pơ anăp kah hăng: lăng glăi, pơtŏng glăi rơđah hơdôm tơlơi pơkă, bruă jao tui tơlơi pơtrun mơng Ping gah tơring čar hăng Jơnum min pơ ala mơnuih ƀon sang tơring čar kơ pơđĭ kyar bơwih ƀong huă - mơnuih mơnam, pơhlôm pơgang lŏn ia rơnuk rơnua thun 2022; laih dong, kiăo tui lăng, hơmâo hơdră prăp rơmet rim blan, rim qúi đah mơng dưi ngă tŭ yua hơdôm tơlơi pơtrun mơng Khua mua pơ ala mơnuih ƀon sang, mơng Kơnuk kơna kơ hơdôm hơdră ngă bruă phun pioh pơđĭ kyar bơwih ƀong huă - mơnuih mơnam hăng him lăng hlâo mrô prăk kơnuk kơna thun 2022. Tañ pơkra hơdră pơđĭ kyar bơwih ƀong huă mơnuih mơnam hăng him lăng hlâo mrô prăk kơnuk kơna thun 2023; akŏ bruă tuh pơ plai thun 2023. Ăt pok pơhai ngă tŭ yua jơlan hơdră dêh čar man pơdong plơi pla phrâo, pơhrŏ trun sang anŏ rin hơđong kơjăp, pơlir hăng bruă pơđĭ kyar kual mơnuih ƀon sang djuai ƀiă hăng čư̆ siăng, biă ñu bruă wai lăng, pơphun tuh pơ plai tŭ yua djŏp mrô prăk phrâo hơmâo Khua mua pơ ala mơnuih ƀon sang dêh čar, Kơnuk kơna pơpha brơi.

VOV Tây Nguyên: Čih - Siu H’Mai: Pơblang