Ƀơi mông jơnum lok 10, Jơnum min pơ ala mơnuih ƀôn sang tơring čar Lâm Đồng tal 10 pơsit, bruă brơi man pơdong sang dŏ ƀơi Đà Lạt dŏ tơdu; Bruă wai lăng kơnuk kơna kơ hơđong rơnuk rơnua bruă man pơdong ƀơi tơring čar dŏ tơdu mơn. Lu sang anŏ ngă soh tơlơi rơnuk rơnua man pơdong anih prong samơ̆ aka ƀu hơmâo anom bruă gơgrong pel ĕp, pơsir brơi tañ. Hơmâo mơn đa arăng bơtơhmal laih samơ̆ ăt dŏ ngă soh mơn, ngă kơ mơnuih ƀôn sang hil biă mă. Amăng anun, tơlơi truh tơhlŏm taluy, tơhlŏm anih man pơkra, ngă kơ 2 čô mơnuih djai hăng 5 čô mơnuih pơkŏn rơka ƀơi phường 10, plơi prong Đà Lạt amăng rơnuč blan 6 phrâo rơgao jing bruă ta kiăng pơhmu nao.

Ơi Trần Văn Hiệp, Khua jơnum min mơnuih ƀôn sang tơring čar Lâm Đồng lăi, bruă pơkă hơnong dăp bruă man pơkra, rơnuk rơnua bruă man pơkra plơi prong kiăng hơmâo wai lăng kơjăp. Gong gai hăng anom apăn bruă kiăng pơčrông sai hăng ba tơbiă hơnong pơkă rơđah kơ rim kual, biă ñu ƀơi hơdôm anih lŏm kơdư, pleh ploh taluy kơtang. Ơi Trần Văn Hiệp lăi:

“Lăng hăng mơta đôč ăt ƀuh mơn anŏ hŭi rơhyưt, hŭi biă samơ̆ Đà Lạt ăt brơi hră ngă bruă mơn. Trun nao pơ jơlan Mimosa, Khe Sanh hơmâo 3-4 boh sang prong arăng iâu biệt thự giăm tơkai čư̆, ăt kiăng lăng glăi mơn, hŭi hơmâo tơlơi truh biă. Kiăng pơhrui glăi abih bang, wơ̆t hăng hră brơi man pơdong. Tơlơi truh tơhlŏm phrâo rơgao jing tơlơi kiăng ƀing ta ñim glăi, kơđiăng lui amăng drah kơtăk mơtăm yơh. Brơi tuh 5.000 tơn lŏn, ta jŭ kiăo tui mrô pơkă truh kơ 8.000 tơn, wơ̆t hăng hơmâo hơjan dong jing truh kơ hơdôm pluh rơbâo tơn...Ngă soh hơnong pơkă rơnuk rơnua apui lơtrik, jing ngă tơbiă gah rơngiao anih pơkă. Ngă taluy ƀu kiăo tui tơlơi pơkă mơ̆ng tơring čar lơi, ngă rơbêh 4m, taluy pơkă tui anun ƀu djơ̆ ôh, anun jing hơmâo tơlơi truh rơngôt tui anun”.

Ăt ƀơi mông jơnum khua pơ ala mơnuih ƀôn sang tơring čar Gia Lai phrâo rơgao, ƀing khua pơƀut lăi nao hơdôm bruă hmư̆ hing amăng man pơdong anih anom sang dŏ. Amăng anun, bruă man pơdong homestay, sang dŏ prong ƀu hơmâo hră pơ-ar ngă kơ lu mơnuih ƀôn sang lăi biă. Yua kaih ngă hơdôm hơnong pơkă čuk pơkra ƀơi hơdôm boh tơring anun pơgăn hĭ bruă pok pơhai hơdôm kơčăo bruă tuh pơ alin.

Ơi Nguyễn Bá Thạch - Khua gơnong bruă Man pơdong tơring čar Gia Lai lăi, bruă wai lăng kơnuk kơna kơ rơnuk rơnua man pơdong anih anom ƀu kơjăp ôh. Lu ring bruă man pơkra soh tơlơi phiăn hơmâo pơkra giong kah mơ̆ng ƀuh, anun jing pơsir tơnap mơn. Tơlơi pơmin mơ̆ng mơnuih ƀôn sang dŏ tơdu, lu mơnuih thâo laih soh samơ̆ ăt hlong či ngă mơn, jing ngă tơnap, pơsir bruă jing kaih.

Bruă kaih lăi pơthâo hơdôm bruă čuk pơkra, man pơdong, jing ba truh lu tơlơi tơnap amăng bruă wai lăng hơđong kơjăp bruă man pơdong, laih anun bơbeč djơ̆ bruă pok pơhai tuh pơ alin kơnuk kơna, ơi Nguyễn Bá Thạch brơi thâo, sit biă ñu ră anai, mrô čuk pơkra kah pơpha tui kual, čuk pơkra tŏng ten ƀơi tơring čar kơnong kơ hơmâo yŭ 30%, aset hloh mrô jŭ yap hrŏm mơ̆ng dêh čar.

“Rơkâo hơdôm boh tơringm hơdôm bruă pơkă hơnong čuk pơka ƀu hơmâo ngă, kiăng lăng glăi či lui hĭ; dưm dăp prăk prăk pioh prăp rơmet ngă bruă rơđah rơđông, pơhlôm djơ̆ hăng hơnong pơkă. Amăng hrơi blơi aka ƀu hơmâo prăk kăk, mơnuih mă bruă hăng hrơi mông mă bruă či ngă giong abih bruă čuk pơkra man pơdong lĕ kiăng hơmâo tơlơi phiăn wai lăng gru pơkra sang dŏ, anih anom đah mơ̆ng thâo wai lăng rơnuk rơnua hơđong bruă man pơdong ƀơi tơring čar”.