VOV4.Jarai-Lơ 7/7, khua mua pơ ala mơnuih ƀôn sang tơring čar Lâm Đồng tal X jơnum lok 6, pioh bơkơtuai hăng pơdah thâo akŏ bruă pơsir tơlơi dŏ kơƀah pơtrut bơwih ƀong huă mơnuih mơnam tơring čar. 6 blan akŏ thun 2022, bơwih ƀong huă mơnuih mơnam mơ̆ng Lâm Đồng hơmâo boh tơhnal lăp pơpŭ biă mă.

Mông jơnum khua mua pơ ala mơnuih ƀôn sang

Amăng anun, ƀuh rơđah bơwih ƀong huă đĭ rơbêh 9,29%; prăk jia pơhrui hơmâo 7.800 klai prăk, đĭ hloh 22% pơkă hăng tal anai mơ̆n thun hlâo. Rơnoh prăk sĭ mơdrô hăng tač rơngiao ăt đĭ 436 klăk USD, đĭ tui 43%; tuai hyu ngui hơmâo rơbêh 3 klăk 700 wơ̆t, đĭ tui 86,5% pơkă hăng tal anai mơ̆n thun 2021. Gah anom bruă mơnuih mơnam, pơhrŏ ƀun rin, pơgang kơđi čar hăng rơnuk rơnua mơnuih mơnam dưi pơhlôm djơ̆.

Khua mua pơ ala mơnuih ƀôn sang Lâm Đồng pơčrông sai pơsir hơdôm tơlơi gun

Hrom hăng anun, Lâm Đồng ăt dŏ hơmâo tơlơi lông lăng, tơnap tap, kơƀah boh nik ñu amăng bruă wai lăng lŏn glai kông ngăn dêh čar, dram gơnam amăng gŭ lŏn, pơkă ling guai lŏn anih dŏ ngă hmua…..Jơnum anai pơtong glăi hơdôm bruă dŏ kơđông, kiăng pơčrông sai pơsir hĭ, pơblang tong ten ĕp hơdră pơtrut bơwih ƀong huă mơnuih mơnam kiăng pơđĭ kyar.

Nay Jek: Pơblang