Thun 2022, tơlơi bơwih ƀong huă mơnuih mơnam tơring čar Lâm Đồng ăt pơđĭ kyar kơtang, dưi tŭ mă lu boh tơhnal yôm amăng djop bruă. Abih bang 18/18 tơhnal pơkă lêng kơ ngă giong hăng rơgao anŏ pơkă. Amăng anun, lăp bơni biă mă ñu hnong pơđĭ kyar bơwih ƀong huă rơbêh 12%, đĭ lu hloh akŏ bruă jao kơnong mơ̆ng 6-7% đôč; bruă ngă hmua pơđĭ kyar hơđong, bruă tuh tia pơkra ming-bơwih bơwăng đĭ lu, tuai čuă ngui rŭ glăi hmar; prăk pơhrui glăi sĭ mơdrô hăng tač rơngiao lĕ lu mơ̆n pơkă hăng akŏ bruă; prăk pơhrui duh jia him lăng sa thun anai truh 13.100 klai prăk. Bruă pơhrŏ ƀun rin dưi ngă lu boh tơhnal klă, tơlơi hơdip mơda mơnuih mơnam, pơgang dêh čar dưi pơhlôm djơ̆.

Pơhiăp ƀơi mông jơnum ơi Trần Đức Quận, ding kơna apăn bruă ping gah dêh čar, Khua git gai ping gah, khua jơnum min pơ ala mơnuih ƀôn sang tơring čar Lâm Đồng lăi lĕ, mah tơlơi bơwih ƀong huă dưi ngă lu boh tơhnal lăp pơpŭ samơ̆ ăt dŏ lu bruă aka ƀu dưi ngă lăp, aka găl amăng bruă git gai, pơcrâo bruă kiăng pơtong glăi, pơčrông sai tong ten laih anun pơčrâo hơdră khom pơsir. Ƀơi mông jơnum anai, ƀing khua mua pơgôp hiăp hăng 27 mơta hră lăi pơthâo hlâo, sem lăng brơi pơsir 28 mơta hră pơtrun yôm, hăng tŭ ư pơsit hơdôm kơčăo bruă lăng yôm biă mă, pơtrut prong amăng bruă pơđĭ kyar ƀơi tơring čar; anun lĕ kơčăo bruă pơkra jơlan rơdêh đuăi hmar Bảo Lộc-Liên Khương tui hơdră kơnuk kơna hăng mơnuih ƀôn sang ngă hrom, kơčăo bruă pơsir tơlơi kơđông rơdêh nao rai amăng plơi prong Đà Lạt.