Ƀơi să Bảo Lâm 2, ia mơng hlao rô trun kơtang biă, ngă ia dăo mơng 80 cm truh 1,2 met amăng lu kual plơi pla. Gong gai ƀon lan hơmâo pơkiăo nao tơhan, kông ang, hlăk ai djru pŭ đĭ gơnam, pơdŭ đuăi hăng ba rơbêh 40 boh sang anŏ nao kơđăp. Hơdôm sang jơnum plơi hơmâo dưm dăp jing anih kơđăp. Ƀơi Đà Lạt, hơjan prong sui hrơi ăt ngă ia dăo lu ară jơlan.

Ƀơi phương Cam Ly-Đà Lạt, čroh ia Tô Ngọc Vân blai đĭ amăng jơlan, đa hơmâo anih ia dăo giăm 1 met, ngă lu rơdêh ôtô djai măi. Sa, dua anih pơkŏn ƀơi Phương Lâm Viên - Đà Lạt hăng phương Xuân Hương-Đà Lạt ăt ia dăo. Lơm hơjan plai ƀiă, ia hơmâo hơđoh trun, anom bruă bơdjơ̆ nao hăng mơnuih ƀôn sang đing nao bruă kuăi rơmet, rŭ pơdong glăi anŏ răm rai.