VOV4.Jarai - Mơguah lơ 8/4, ƀơi plơi prong Đà Lạt, Jơnum min mơnuih ƀôn sang tơring čar Lâm Đồng pơphun Jơnum klah čun bruă bơkơtưn khăp kơ lŏn ia thun 2021, pơphun hăng kĭ pơkôl tơlơi bơkơtưn thun 2022. Bruă jơnum hmâo Kơ-iăng Khua mir sir dêh čar ta yă Võ Thị Ánh Xuân, Kơ-iăng Khua tal sa Khul wai lăng bruă pơplông apah pri bơni dêh čar ta nao pơhmư̆.

Pơhiăp amăng mông jơnum, ơi Trần Đức Quận, Ding kơna Grŭp mă bruă Ping gah dêh čar ta, Khua git gai Ping gah tơring čar, Khua Khul pơ ala mơnuih ƀôn sang tơring čar Lâm Đồng lăi lĕ, khă hmâo lu bôh tơhnal klă samơ̆ bruă bơkơtưn khăp kơ lŏn ia mơng tơring čar ăt dô̆ hmâo mơn tơlơi akă dưi ngă. Kiăng hơkrŭ pơsir, ngă bruă bơkơtưn khăp kơ lŏn ia mơng tơring čar hmâo lu bôh tơhnal dlông hloh lĕ, hơdôm gưl ping gah, gong gai khom hmâo hơdôm bruă mă rơđah rơđông hăng sit nik. Tal anai, pơ ala kơ Khul wai lăng bruă pơplông apah pri bơni dêh čar, Kơ-iăng Khua mir sir dêh čar ta yă Võ Thị Ánh Xuân hmâo ƀơk laih Miđai rơngai dăp tal dua, Miđai pơgang lŏn ia dăp tal dua hăng hơdôm miđai mă bruă dăp tal sa, dua, tlâo kơ 24 čô mơnuih hăng 8 grŭp mơnuih hmâo bôh than prong amăng ngă tui hơdôm bruă pơlông khăp kơ lŏn ia ƀơi tơring čar./.

Siu H’ Prăk: Pơblang