Gong gai ƀon lan glăk đing nao pok pơhai lu hơdră pơhlôm hlâo hŭi lŏn tơhroh; amra rơkâo mơnuih ƀôn sang tơbiă mơng anih hŭi rơhyưt anai kiăng plai ƀiă anŏ răm rai. Hơdôm hrơi rơgao, mơnuih ƀôn sang să Dă K’Nàng, tơring glông Đam Rông (tơring čar Lâm Đồng) dŏ dong ăt ƀu hơđong ôh yua hŭi lŏn tơhroh. Amăng lơ 15/7 hăng 20/7 ƀuh dua wŏt lŏn tơhroh ngă 3 čô mơnuih djai, mah hơmâo gong gai rŭ pơdong glăi, hlă kơƀang pơhŭi hlâo samơ̆ ăt amuñ ƀuh lŏn tơhroh dong mơn.

Hrŏm hăng tơring glông Đam Rông, lu kual amăng tơring čar Lâm Đồng pơhŭi hlâo amra ƀuh lŏn tơhroh amăng bơyan hơjan hlim anai. Amăng anun, plơi prong Đà Lạt hơmâo 61 anih hăng plơi prong Bảo Lộc hơmâo 55 anih hŭi rơhyưt. Hlâo kơ hrơi hơjan prong sui hrơi lu anih, Jơnum min mơnuih ƀôn sang tơring čar Lâm Đồng tŏ tui hơmâo hră pơ-ar git gai djop anih anom hăng Jơnum min mơnuih ƀôn sang hơdôm boh tơring glông, plơi prong đing nao pok pơhai lu hơdră bruă kiăng pơsir hĭ, pơhlôm hlâo hŭi lŏn tơhroh.