Pơkă kual Lâm Đồng rơwang 2021-2030, tơhnal lăng nao truh thun 2050 dưi hmâo Khul pel ĕp dêh čar ta lăng glăi hăng pơphun ngă giong akô̆ bruă tui tơlơi gum pơhiăp pơsit glăi. Amăng anun, rơngiao kơ bruă pơkă kual hrŏm plơi prong Bảo Lộc hăng kual jum dar hmâo ngă giong laih bruă lăng glăi, lăi pơthâo pơsit, kah hăng abih bang hơdôm bruă pơkă kual pơkon leng kơ kaih rơnoh bơhmu hăng rơnoh pơkă.

Ơi Lê Quang Trung, Khua Gơnong bruă man pơdŏng tơring čar Lâm Đồng brơi thâo, tui hăng rơnoh pơkă lĕ bruă pơdŏng hơdôm kual pơkă tơring glông amăng tơring čar kaih laih bơhmu hăng kơčăo bruă ba tơbiă. Bôh than ba truh lĕ yua kơ tơlơi pơkă kual tơring glông mơ̆ng hơdôm anih anom hmâo anô̆ pha ra, hmâo tơring glông lĕ ba tơbiă pơkă rơđah kơ bruă pơkă kual tơring glông samơ̆ tui tơlơi pơkă lĕ ƀu dưi ba mut amăng bruă pơkă rơđah rơđông ôh. Yua anun khom rơngiă lu mông nao rai, pơplih pơkra glăi lu wot./.