Ƀơi Đà Lạt, anih pơdong sang bruă kơnuk kơna phun kơ tơring čar Lâm Đồng ră anai hơmâo 1.300 čô mơnuih apăn bruă kơnuk kơna rai mơ̆ng Dak Nông hăng Bình Thuận. Rơbêh 8000 čô mơnuih ăt dŏ jao mă bruă amăng anih mă bruă hơđăp, kiăng tŭ mă bruă mă phrâo, kiăng ngă gêh găl pơsir hră pơar kơ mơnuih ƀôn sang. Hăng 124 boh să, phườnh, anih ngă bruă yom phara tơdơi kơ dăp pơmut glăi, pơsir hră pơar amăng kơnuk kơna dưi hruaih, pơblih pơđĭ tui klă hiam. Hră pơar pơsir giong djơ̆ hrơi pơkă hăng hlâo tañ hloh truh 97% amăng mrô rơbêh 18.500 pok hră pơar.

Kơ-iăng khua dêh čar čih pioh hăng lăng tom hơdôm boh tơhnal blung a mơ̆ tơring čar Lâm Đồng dưi ngă. Kơnong kơ bruă prăp lui jơnum ruah khua ping gah, tơring čar hăng gưl să khom ngă klă hloh, kiăo tui djơ̆ akŏ bruă dăp hlâo. Kơ-iăng khua dêh čar, ơi Nguyễn Hòa Bình lăi lĕ, rơnoh pơđĭ kyar bơwih ƀong huă ƀơi Lâm Đồng ră anai ngă tui aka ƀu lăp hăng anŏ gêh găl, kiah ngă djop 5%. Hrŏm hăng anun, kiăng ngă djơ̆ hrơi blan pơkă, lu kơčăo bruă, ring bruă hơmâo pơphô laih hlâo ăt dŏ rơnang hăng kaih yua tơnap amăng bruă pơklaih ala lŏn čuk pơdăo; mă yua prăk tuh pơ alin aka ƀu djop ôh; bruă wai lăng kông ngăn, dram gơnam dŏ kơƀah; lu anih amăng kual plơi pla mơnuih djuai ƀiă dŏ tơnap tap đôč.....Hơdôm tơlơi anai, tơring čar kiăng kơtưn hloh bruă git gai wai lăng hăng pơčrâo bruă, boh nik ñu đing nao pơsir hăng ruh hĭ tơlơi rung amăng hrơi blan pơ anăp.