VOV4.Jarai - Bơdjơ̆ nao bruă hlong phă glai mă pô či ngă jơlan Trường Sơn Đông, lơ 14/2, Gơnong bruă hmua hăng pơđĭ kyar ƀon lan tơring čar Lâm Đồng hơmâo hră lăi pơthâo glăi tañ kơ Jơnum min mơnuih ƀon sang tơring čar rơkâo Ding jum pơphô bruă, Ding jum ling tơhan git gai pơdơi hlao bruă pơkra jơlan.

Anih pơkra jơlan Trường Sơn Đông bơbeč djơ̆ glai rưng arăng kŏm.

Tui hăng tơlơi lăi pơthâo glăi mơng Gơnong bruă hmua hăng pơđĭ kyar ƀon lan tơring čar Lâm Đồng, Anom bruă wai lăng glai tơring čar git gai, ngă hrŏm hăng Anom bruă wai lăng glai tơring glông Lạc Dương, Đang glai dêh čar Bidoup - Núi Bà hyu sem lăng anih pơkra jơlan Trường Sơn Đông ƀơi tơring glông Lạc Dương, tơring čar Lâm Đồng yua Anom bruă wai lăng mrô 46 - Ding jum Pơphô bruă, Ding jum ling tơhan ngă pô tuh pơ alin prăk kăk. Rơđah biă ñu, jơlan hơmâo pok glông rơbêh 3,3km laih, prong 4m. Amăng anun, mrô lŏn glai hơmâo mă pioh pơkra jơlan nao rai lĕ năng ai 2,3km. Hơmâo rơbêh 1km jơlan hơmâo pơkra ƀơi lŏn glai arăng kŏm aka ƀu hơmâo hră pơ-ar brơi mă yua ôh.

Siu H’Mai: Pơblang