Jơnum min mơnuih ƀôn sang tơring čar Lâm Đồng git gai djop tơring glông, plơi prong Đà Lạt hăng plơi prong Bảo Lộc ăt hyu sem lăng, jŭ yap anih mơnuih ƀôn sang dŏ, sang hră, sang ia jrao, sang bruă kơnuk kơna, puih kơđông tơhan ter hang ia krông, ia ania, kual giăm kriăng čư̆ kiăng tañ ƀuh, pơhŭi hlâo kual či hơmâo tơlơi truh lŏn tơhlŏm, ia tơluh trun mơ̆ng kơčŏng čư̆, ia ling dăo ƀơi plung dơnung.

Biă mă ñu, Jơnum min mơnuih ƀôn sang tơring čar Lâm Đồng pơtrun hiăp djop tơring glông, plơi pla amăng tơring čar khom pơdŭ đuăi mơnuih ƀôn sang, mơnuih mă bruă kơnuk kơna dŏ ƀơi anih či hơmâo tơlơi truh lŏn dlưh trun, kiăng pơhlôm pơgang tong ten tơlơi hơdip hăng dram gơnam djop mơnuih. Laih dơ̆ng, prăp lui ngă tui hơdră dăp bruă, djru ngă hơđong anih dŏ kơđăp hăng hơđong tơlơi hơdip mơda brơi mơnuih ƀôn sang lơ̆m đuăi mơ̆ng sang anŏ anih dŏ. Kơnong pơ anih jơlan čun čue Bảo Lộc, kiăng hơmâo hơdră dŏ mă bruă hrơi mlam ƀơi anun kiăng thâo tañ tơdah hơjan na nao, hlim prong, khom hơmâo hơdră pơsir brơi jơlan rơdêh dưi nao rai hruaih amăng hrơi mông hơmâo tơlơi truh.