VOV4.Jarai - Lơ 10/2, Anom bruă pel ĕp tơring čar Lâm Đồng brơi thâo glăk gum hrŏm hăng hơdôm anom bruă bơdjơ̆ nao pơphun nao pel ĕp bruă blơi gơnam tam gah ia jrao ƀơi 2 anih amăng tơring čar mơng Kông ti Việt Á. Hlâo anun, tơring čar Lâm Đồng pơsit 2 anom bruă blơi kit pơčrang lăng klin Covid-19 mơng Kông ti pơčruh ngăn Việt Á lĕ Sang ia jrao prong II Lâm Đồng (ƀơi plơi prong Bảo Lộc) hăng Anom bruă wai pơgang klin tơring čar Lâm Đồng. Bruă blơi kit pơčrang lăng anai hơmâo pơphun 3 wŏt, mơng blan 2 truh pơ blan 8/2021, hăng abih tih 47.000 kit, mrô prăk rơbêh kơ 18 klai prăk. Kiăng kơ pel ĕp bruă blơi gơnam gah ia jrao, kit pơčrang lăng klin Covid-19 mơng hơdôm anom bruă hơmâo pơphun djơ̆ tui tơlơi pơkă, Anom bruă pel ĕp tơring čar Lâm Đồng hơmâo hră pơtrun rơkâo djop anom bruă bơdjơ̆ nao pơkiăo nao mơnuih djru brơi, laih dong hơmâo tơlơi pơsit pel ĕp djơ̆ hăng tơlơi git gai, črâo ba mơng anom bruă pel ĕp Kơnuk kơna.

Siu Đoan: Pơblang