VOV4.Jarai - Ƀơi anăp mrô mơnuih ƀă Covid-19 amăng tơring čar đĭ lu, lơ 24/2, Jơnum min mơnuih ƀôn sang tơring čar Lâm Đồng hmâo hră pơ-ar črâo ba hơdôm bôh anom bruă, Jơnum min mơnuih ƀôn sang hơdôm bôh tơring glông, plơi prong amăng tơring čar kơtưn pok pơhai khop hơdôm bruă pơgang, pơgăn. Amăng ha mơkrah blan rơgao, mrô mơnuih ƀă Covid-19 phrâo ƀơi Lâm Đồng đĭ tañ rơbêh kơ 25.700 čô mơnuih. Lăp đing nao, amăng mrô hơdôm mơnuih ƀă klin lu ñu čơđai sang hră hăng nai pơtô čơđai. Kơnong yap mơng lơ 7/2 truh ră anai, mrô yap akă djop brơi ƀuh hmâo ƀiă biă mă ñu 1.700 čô čơđai hăng hơdôm rơtuh čô nai dưi pơsit ƀă Covid-19. Jơnum min mơnuih ƀôn sang tơring čar Lâm Đồng rơkâo Gơnong bruă pơtô pơhrăm tơring čar pel ĕp na nao, lăng tui bruă pok pơhai pơgang pơgăn klin ƀơi hơdôm bôh sang hră, anih anom pơtô pơhrăm ƀơi tơring čar; pơsir tơpă hơdôm mơnuih ƀu ngă tui hơdôm bruă pơgang, pơgăn Covid-19 tui tơlơi pơkă. Jơnum min mơnuih ƀôn sang tơring čar Lâm Đồng ăt črâo ba mơn Gơnong bruă ia jrao Lâm Đồng pok pơhai bruă tlâ̆o vaccine pơgang Covid-19 tañ hloh dong, biă ñu tañ pơphun tlâ̆o huĕt abih ară ta sa hăng tal 2 kơ mơnuih mơng 12 thun hăng lu hloh hrom hăng ară lok glăi, liều pơhrua nao kơ mơnuih 18 thun hăng lu hloh kơ anun, yap wot hơdôm mơnuih rai mơng anih pơkon. Pơhlôm amăng blan 2/2022 anai, abih bang mơnuih mơng 12 thun hăng lu hloh leng kơ tlâ̆o djop liều vaccine pơkă phun./.

Siu H’ Prăk: Pơblang