Thun 2022, abih tih prăk tuh pơ alin bruă čar amăng tơring čar Lâm Đồng hơmâo kah pha lĕ giăm 6.500 klai prăk kiăng man pơkra 350 ring bruă. Amăng anun, hơmâo 722 klai prăk lĕ rơnoh prăk mă yua mơng thun 2021.

Tui ơi Bùi Sơn Điền, Khua gơnong kơčăo bruă hăng tuh pơ alin tơring čar Lâm Đồng, yap truh lơ 15/11, akŏ bruă tuh pơ alin bruă čar thun 2022 amăng tơring čar  phrâo jao trun 3.694 klai prăk, dưm dưm 68,5% tui tơlơi pơkă. Bruă jao prăk dŏ kaih lĕ yua bưp tơp tap, gun găn amăng pơhrui glăi lŏn pioh man pơdong hăng bruă ngă hră pơ-ar. Ră anai anom bruă glăk gir run gum hrŏm hăng anom bruă bơdjơ̆ nao amăng tơring čar pơtrut hơdôm anom bruă tuh pơ alin tañ man pơkra. Gir run truh lơ 31/12 pơ anăp amra jao trun prăk tuh pơ alin rơbêh 95% hăng truh abih rơwang tal I/2023 dưm dưm 100% tui tơlơi pơkă.

“’Ƀing gơmơi ăt hơmâo mông mă bruă hăng anom bruă tuh pơ alin, hăng hơdôm ƀon lan glăk bưp lu tơlơi tơnap tap. Samơ̆, tui tơlơi him lăng hlâo hăng tui tơlơi ƀuăn mơng hơdôm anom bruă tuh pơ alin, abih tih amra jao trun djơ̆ hrơi mông pơkă. Rơnoh prăk dŏ glăi lu biă mă lơm anun hrơi mông ngă tui kơnong amăng 1 blan đôč, yua anun kâo ăt hơmâo mông mă bruă, iâu telephôn kiăng pơtrut, pơtă pơtăn. Kơnong sa, dua akŏ bruă him lăng amra kaih tui hrơi blan pơkă ăt hơmâo lăi pơthâo brơi Jơnum min mơnuih ƀon sang tơring čar”.

Sit biă ñu, hơdôm akŏ bruă hơmâo prăk tuh pơ alin dŏ kaih lêng hơdôm ring bruă yua hơdôm gơnong bruă, anom bruă amăng tơring čar tuh pơ alin. Sit biă ñu, gơnong bruă pôr pơhing hơmâo kah pha 22 klai prăk samơ̆ phrâo jao trun prăk kơnong 28%, gơnong bruă ngă hmua hăng pơđĭ kyar ƀon lan kah pha 224 klai prăk hăng phrâo jao trun kơnong 23%, Sang ia jrao prong tơring čar hơmâo kah pha 12 klai prăk samơ̆ prăk jao trun kơnong 11% đôč…

Ƀơi anăp kơ bruă prăk tuh pơ alin jao trun dŏ kaih, ơi Trần Văn Hiệp, Khua Jơnum min mơnuih ƀon sang tơring čar Lâm Đồng brơi thâo amra pơsir khut khăt tui tơlơi glăm ba mơng hơdôm anom bruă tuh pơ alin tơdah ƀu pơhlôm jao prăk tuh pơ alin djơ̆ tơlơi pơkă.

“Jao prăk tuh pơ alin bruă čar mơng tơring čar dŏ lu tơlơi sư̆ rơbư̆, kaih amăng bruă duh prăk pơhrui glăi lŏn pok man pơdong, sa, dua boh ring bruă him lăng amra man pơkra yơh samơ̆ aka ƀu dưi ngă lơi. Amăng anun, bruă jao prăk čan mơng sa, dua gơnong bruă dŏ lu tơlơi gun, kiăng lăng glăi hăng anăm brơi ƀuh dong tah. Tui tơlơi pơsit truh rơnuč thun, anom bruă hơpă ƀu jao trun prăk tuh pơ alin amra mă glăi hăng ƀu brơi glăi dong tah, mah ring bruă mang pơdong aka ƀu giong. Hăng tơlơi glăm ba yua khua mua hơdôm gơnong bruă, anom bruă”.