VOV4.Jarai-Yua ngă hră pơar lu črăn đơi, ƀing khua mua sang bruă ƀu khin kĭ, pơtrut tơlơi glăm ba jang nao rai tơdruă, anun ngă kơ bruă pơhưč tuh pơ alin ƀơi tơring čar Lâm Đồng drơ̆ng glăi hĭ. Mơ̆ng akŏ thun truh ră anai, tơring čar Lâm Đồng kơnong hơmâo 9 kơčăo bruă tuh pơ alin hăng đơ đam lŏn rơkâo ngă 77 ha laih anun rơnoh prăk tuh pơ alin kiah 700 klai prăk.

Lâm Đồng pơhưč tuh pơ alin dŏ lu tơlơi aka ƀu găl

Hrom hăng anun, 24 kơčăo bruă rơkâo pơblih glăi bruă tuh pơ alin, 3 kơčăo bruă brơi lui hĭ mă glăi, ƀu brơi mă bruă. Rơnoh kơčăo bruă tuh pơ alin amăng tơring čar truh ră anai hơmâo 969 kơčăo bruă, amăng anun hơmâo rơbêh 600 kơčăo bruă đôč ngă giong hăng dŏ mă bruă. Jơnum min mơnuih ƀôn sang tơring čar Lâm Đồng lăi, pơhưč tuh pơ alin ƀơi tơring čar rơnang glăi hĭ yua tơlơi pơkă, jơlan hơdră ngă hră pơar dŏ lu črăn, khua sang bruă dơneh ƀu gưt kĭ hră pơar, ƀu gơgrong amăng bruă mă bơjang nao rai amăng mông mă bruă ngă kơ bruă tuh pơ alin ƀu amuñ ôh.

Nay Jek: Pơblang