Ƀơi mông jơnum, Ping gah tơring čar Lâm Đồng lăi pơthâo hră pơtrun akŏ pơdong Khul git gai pơƀut bruă ngă tui Hră pơtrun mrô 18 gah anom bruă ping gah tơring čar Lâm Đồng, yua kơ ơi Nguyễn Thái Học, Khua jăng jai git gai ping gah tơring čar Lâm Đồng ngă khua khul. Gah anom bruă gong gai kơnuk kơna lĕ, anăp nao dăp glăi pơmut Gơnong bruă Man pơphô hăng Tuh pơ alin hăng Gơnong bruă Prăk kăk; Gơnong bruă Jơlan glông Pơdŭ pơgiăng pơmut hrŏm Gơnong bruă Man pơdong; Gơnong bruă wai lăng kông ngăn lŏn mơnai hăng ayuh hyiăng pơmut hrŏm Gơnong bruă Ngă hmua hăng Pơđĭ kyar plơi pla; Gơnong bruă Tơlơi pơhing hăng Pôr pơthâo pơmut hăng Gơnong bruă Kơsem min boh thâo ia rơgơi; Gơnong bruă wai lăng bruă mă, tơhan rơka hăng Mơnuih mơnam pơmut hăng Gơnong bruă čar.

Laih anun jao tơlơi dưi bruă mă wai lăng amăng kơnuk kơna hơđăp, kơ anom bruă phrâo kiăng gêh găl djơ̆ lăp. Kơ anăp dăp bruă ƀing ngă khua, ruah mơnuih apăn bruă kiăng hơbôt, pơhrŏ mrô mơnuih mut bruă sit nik; ruah mă mơnuih thâo rơgơi, mơnuih tơpă, hmar, pran jua hiam, sit lăi, dưi ngă mơtam, kiăng gơñu dưi ngă giong bruă jao klă hloh.