VOV4.Jarai - Lơ 26/7, Grup krăo lăng mơng Ƀirô Khua pơ ala mơnuih ƀon sang dêh čar yua Thượng tướng Trần Quang Phương, Ding kơna Ping gah dêh čar, Kơ-iăng Khua pơ ala mơnuih ƀon sang dêh čar ba jơlan hlâo hơmâo mông mă bruă hăng Jơnum min mơnuih ƀon sang tơring čar Lâm Đồng kơ bruă pơkrem, pơgăn yua khưi khai rơwang thun 2016-2021. Amăng thun blan laih rơgao, Lâm Đồng hơmâo đing nao wai lăng kjăp bruă mă yua ngăn drăp kơnuk kơna, pơhlôm phrui lăp djơ̆, djop, pơgăn kơƀah amăng pơhrui hăng hrŏ trun hnưh đôm mă jia. Laih dong, wai lăng kjăp bruă pơhrui hăng mă yua ngăn drăp amăng rĭm thun.

Mông jơnum

Amăng anun, dưi pơkrem 326 klai prăk mă yua amăng bruă wai lăng, rơbêh 23 klai 800 klăk rơnoh prăk yua gah pơtô pơjuăt, rơbêh 23 klai 500 klăk prăk mă yua gah ia jrao …Đĭ pơhiăp amăng mông mă bruă, pơ ala brơi grup krăo lăng, Thượng tướng Trần Quang Phương, Kơ-iăng Khua pơ ala mơnuih ƀon sang dêh čar tŭ yap, lăng yôm hơdôm tơlơi gir run mơng tơring čar Lâm Đồng lơ̆m ngă tui bruă jao amăng pơkrem, pơgăn yua khưi khai rơwang thun 2016-2021. Laih dong, rơkâo tơring čar kiăng đing nao dong bruă pơplih ngă hră pơ-ar, ha bơnah - ha bơnah pơlir hơbit, pơtă tơring čar Lâm Đồng kiăng tŏ tui đing nao pel ĕp hăng pơsir hĭ hơdôm bruă ƀom kiơng bơdjơ̆ nao lŏn mơnai. Đing nao ƀiă dong hơdôm tơlơi dưi mơng Đà Lạt, pơđĭ kyar anih anom brơi klă dong, lăp djơ̆ hăng tơlơi pơplih phrâo amăng jar kmar.

Siu Đoan: Pơblang