Ngă tui Tơlơi pơtrun mrô 57 mơ̆ng Ding jum kơđi čar kơ pơplih boh thâo ia rơgơi, măi mok, pơčeh phrâo rơgơi hloh hăng pơplih mă yua boh thâo mrô dêh čar, mơguah tom brơi (lơ 14/8), ƀơi Đà Lạt, Jơnum min mơnuih ƀôn sang tơring čar Lâm Đồng pơphun bruă abih bang mơnuih hrăm boh thâo mrô.

Ƀơi mông iâu pơthưr, Khua Jơnum min mơnuih ƀôn sang tơring čar Lâm Đồng ơi Hồ Văn Mười jak iâu abih bang khua mua, mơnuih mă bruă hăng abih bang mơnuih ƀôn sang sem lăng, gum ngă, khut khăt hăng bruă abih bang mơnuih hrăm boh thâo mrô; hơdôm gơnong bruă, anom bruă, plơi pla lăng ba tuh pơ alin blơi măi mok gơnam yua pơhlôm kiăng hơmâo, lăng glăi abih bruă pơtô pơjuăt, pok anih hrăm pơtô boh thâo mrô lăp djơ̆ hăng rim čô mơnuih, ƀu thâo ruai kơ tha čơđai, mă bruă anai bruă adih ôh. Tơdơi kơ pơphun bruă abih bang mơnuih hrăm boh thâo mrô, hơdôm rơbâo čô khua, mơnuih mă bruă kơnuk kơna, mơnuih mă bruă mơ̆ng tơring čar Lâm Đồng hơmâo pơƀuh brơi, pơtô mă yua glông internet bơwih brơi mă bruă mơ̆ng gong gai 2 gưl, mă yua pô djru bruă amăng măi, Chat GPT, ba tơbiă hơdră bơwih brơi kơ tuai čuă ngui tui tơlơi rơgơi rơnuk 4.0; pơƀuh Glông pôr pơhing gah lŏn tơnah./.