Akŏ bruă man pơdong anih anom, jơlan glông amăng plơi pla, anih dŏ phrâo ƀơi să Dă Huoai, tơring čar Lâm Đồng lĕ sa amăng hơdôm ring bruă akŏ phun amăng bruă pơdong anih dŏ phrâo mơng akŏ bruă jơlan rơdêh đuăi hmar Tân Phú-Bảo Lộc. Akŏ bruă anai hơmâo abih tih prăk tuh pơ alin rơbêh 150 klai prăk. Hrŏm hăng bruă bơdjơ̆ nao yua hơjan lu đơi, bruă man pơkra glăk kaih yua bưp tơnap tap amăng bruă pơhrui glăi lŏn mơnai. Ơi Lê Bảo Thi, mơnuih wai lăng akŏ bruă man pơkra anih anom, jơlan glông kual plơi pla phrâo anai brơi thâo, anom bruă man pơkra hơmâo prap lui djop gơnam măi mok, ƀing kông ñơn, amra pơtrut tañ tơdơi kơ hơdôm tơlơi gun hơmâo pơsir hĭ.

“Ră anai, ƀing kông ñơn glăk dŏ mă bruă ƀơi ring bruă ƀiă biă mă ñu 60 čô, amra man pơkra djop bơnah ƀơi ring bruă anai. Dŏ tơguăn kơnong pơ-iă, bruă man pơkra hơmâo anom bruă pok pơhai mơtăm. Truh lơ 31/12 him lăng amra dưi jao glăi sang dŏ hơdôm boh sang anŏ”.

Thun 2025, abih tih prăk tuh pơ alin man pơdong amăng tơring čar Lâm Đồng lĕ 18.700 klai prăk. Amăng 7 blan, đơ đam tơring čar hơmâo jao giăm 30% tui tơlơi pơkă. Bruă jao prăk tuh pơ alin man pơdong kaih lĕ yua bưp tơlơi gun amăng pơhrui glăi lŏn mơnai. Ră anai lu akŏ bruă, ring bruă hơmâo pơgiong hră pơ-ar, samơ̆ lŏn mơnai aka ƀu mă glăi yua anun aka ƀu dưi pok pơhai.

Ơi Hồ Văn Mười, Khua Jơnum min mơnuih ƀôn sang tơring čar Lâm Đồng brơi thâo, kiăng pơgiong bruă jao prăk tuh pơ alin man pơdong thun 2025 rơbêh 95%, tơring čar kiăng hơmâo tơlơi gir run prong hloh. Amăng anun, pơhrui glăi lŏn mơnai lĕ sa amăng hơdôm bruă akŏ phun, rơkâo djop anih anom kơđi čar gum hrŏm.

“Tơlơi găn rơgao mơng ƀing apăn bruă amăng pơhrui lŏn mơnai lĕ yôm phăn biă mă. Ƀing hlơi nao mă bruă mơ̆ ngă bruă tui hluai pran hor ăt ƀu dưi ôh. Yua anun kiăng ruah mơnuih, dưm dăp mơnuih hiưm pă brơi djơ̆, brơi hlơi pô nao pơtrut pơsur. Lơm nao pơsur bruă pơhrui glăi lŏn mơnai kiăng hơmâo djop anih anom kơđi čar mut hrŏm”. /.