Truh ră anai, mrô prăk  mă yua tuh pơ alin kơ bruă čar ƀơi Lâm Đồng dưi ngă 30% akŏ bruă, ƀiă hloh pơkă hăng lu anih pơkŏn amăng dêh čar lĕ 39%, dăp tal 31 amăng mrô 34 boh tơring čar, ƀôn prong.

Phun ñu lĕ yua mă prăk čan tuh pơ alin kơ bruă čar ƀơi Lâm Đồng aset lĕ, dŏ gun lu bruă duh glăi prăk djơ̆ lŏn sang đang hmua mơnuih ƀôn sang; pioh čuk pơdăo; bruă mă prăp lui tuh pơ alin dŏ kaih hăng ba yua rơnoh prăk aka ƀu gêh găl mơ̆ng hơdôm kơčăo bruă. Tơring čar pơkă tơhnal či ngă truh abih blan 9 amra mă yua truh 65% akŏ bruă jao. Đĭ pơhiăp git gai jơnum, Khua Jơnum min mơnuih ƀôn sang tơring čar Lâm Đồng, ơi Hồ Văn Mười pơtrun hiăp, djop sang bruă, anom bruă, tơring, plơi pla khom jŭ yap glăi abih, pơtum pơsir hĭ tơlơi tơnap, pơtrut hmar hloh rơnoh bruă, mă yua prăk tuh pơ alin; laih dơ̆ng khom sem tong ten tơlơi gơgrong pô ngă khua git gai bruă mă, plơi pla.