VOV4.Jarai-Lơ 9/8, Gơnong bruă Jơlan glông hăng Pơdŭ pơgiăng Lâm Đồng brơi thâo, anom bruă anai hlăk tañ pơphun čuk pơkra glăi jơlan čun čue čư̆ Mimosa giăm 5 km ƀơi črăn hlăk răm tui kơtang tơdơi kơ tơguan sui thun blan tŭ mă prăk djru. Jơlan čun čue čư̆ Mimosa, jing jơlan phun mut nao rai amăng plơi prong Đà Lạt, Lâm Đồng ataih giăm 11 km. Anai le, črăn jơlan djop mơta rơdêh prong pơgiăng gơnam, rơdêh pơgiăng tuai anet prong rơbêh 1,5 tơn pơngŏ nao rai kiăng plai ƀiă kơniă jơlan čun čue đĭ čư̆ Prenn. Samơ̆, yua rơdêh nao rai lu đơi anun yơh jơlan čun čue čư̆ Mimosa tañ răm hĭ kơtang. Blan 6/2021, Ding jum Jơlan glông hăng Pơdŭ pơgiăng pơpha prăk brơi kơ Gơnong bruă Jơlan glông hăng Pơdŭ pơgiăng tơring čar Lâm Đồng pô tuh pơ alin, pơkra glăi.

Giăm 5 km jơlan čun čue răm kơtang biă mă

Yua kơƀah prăk, kơnong tŭ mă 34 klai mơkrah mơ̆ng keh prăk pioh ming pơkra jơlan, bruă ngă pơkra glăi črăn jơlan 6 km ngă giong, dŏ glăi 5 km aka ƀu djop prăk pơkra, anun jai hrơi jơlan răm kơtang hloh. Ră anai, rơnoh prăk pơkra ming jơlan giăm 5 km dŏ glăi ƀơi jơlan čun čue čư̆ Mimosa dưi hơmâo Ding jum Jơlan glông hăng pơdŭ pơgiăng djru prăk, tơring čar Lâm Đồng amra tañ ming pơkra glăi hăng pơkă blan 11 pơ anăp amra giong.

Nay Jek: Pơblang