VOV4.Jarai-Ăt amăng hơdră jơnum lok 10, mơguah lơ 26/4, Jơnum min apăn bruă git gai pơ ala mơnuih ƀôn sang dêh čar pơgôp hiăp Kơčăo bruă pơblih phrâo, pơđĭ tui boh tŭ yua jơnum khua mua pơ ala mơnuih ƀôn sang dêh čar, pơblih pơkra, pơhrua nao dơ̆ng Tơlơi phiăn jơnum khua pơ ala mơnuih ƀôn sang dêh čar. Kơčăo bruă ăt pơblih phrâo, kiăng ba glăi boh tŭ yua yôm rĭm jơnum lok mơ̆ng ƀing khua pơ ala mơnuih ƀôn sang dêh čar. Mơ̆ng anun ruah mă, rơkâo đĭ hơdôm boh yôm phun jơnum. Mơ̆ng mông jơnum ƀu pơkă hlâo tal sa phrâo rơgao lăi pơthâo lu tơlơi kiăng kơsem min kơ tơlơi pơtô djơ̆ hăng bruă ngă tui sit nik kơ boh yôm phun, anŏ gêh găl pơphun jơnum, akŏ klôn bruă mă, hră pơar dăp lui hlâo….

Djop hră pơtrun tơdơi kơ ngă giong khom ngă rơđah tui hăng ba yua sit nik amăng tơlơi hơdip mơda. Tlam hrơi anai mơ̆n, Jơnum min apăn bruă git gai pơ ala mơnuih ƀôn sang dêh čar jơnum pơđut lok 10. Hlâo kơ pơđut, Khua git gai pơ ala mơnuih ƀôn sang dêh čar ơi Vương Đình Huệ đĭ pơhiăp pơđut jơnum, Jơnum apăn bruă git gai pơ ala mơnuih ƀôn sang dêh čar jơnum hơgŏm, pơgôp hiăp hră lăi pơthâo jŭ yap prăk kăk kơnuk kơna thun 2020 hăng lăi pơthâo bruă prăk kăk kơnuk kơna thun 2020.

Nay Jek: pơblang