Tơlơi čih pioh mơ̆ng Anom bruă pôr pơthâo tơlơi truh lŏn pơpư̆ hăng pơhŭi hơmâo hơmâo ia rơsĭ bluk, Sang bruă Kơsem min boh lŏn Vật lý Địa cầu brơi thâo, kơnong amăng 20 hrơi akŏ blan 7, ƀơi tơring glông Kon Plong, tơring čar Kon Tum hơmâo truh hơdôm rơtuh wơ̆t lŏn pơpư̆ čư̆ mơgơi ƀơi tơring čar anai. Dŏ hơdip gah dơnung kual sang măi pơkra apui lơtrik Gah hlâo Kon Tum, amai Trần Thị Thu, hăng lu mơnuih ƀôn sang thôn 3, să Tân Lập, tơring glông Kon Braih bơngơ̆t biă lơ̆m hmư̆ hing hơmâo lŏn pơpư̆.

“Kual ană plơi dŏ gah tơkai bơnư̆ kŏng ia. Neh met wa hmư̆ hing hơmâo lŏn pơpư̆ čư̆ mơgơi jing bơngơ̆t biă mă. Tơdah hơmâo lŏn pơpư̆ tơtar mơ̆ pơđoh ia truh ƀudah hơmâo ia lĭp trun lĕ neh met wa pơ anai dăo mlĕp amăng ia mơtăm yơh. Juăt ñu pơđoh ia đôč dăo yơh, tui anun hiư̆m mơ̆ng thâo hơdip”.

Sit nik, amăng hơdôm rơtuh wơ̆t hơmâo tơlơi truh lŏn pơpư̆ hrơi blan rơgao ƀơi Kon Plong, mơnuih ƀôn sang hui đôč mơ̆ng mưn lŏn pơpư̆. Mơnuih ƀôn sang kơnong thâo hơmâo lŏn pơpư̆, lŏn tơtar yua hơmâo anom apăn bruă, anom pôr pơhing đôč. Yă Bùi Thị Oanh, sang ñu ƀơi plơi Vi Rin, să Đăk Tăng, tơring glông Kon Plong lăi tui anai:

“Mơnuih ƀôn sang pơ anai gơñu lăng huăi hơget lơi. Hơmâo pô djai ƀiă koh ta mơ̆ng hŭi. Aka ƀu hơmâo tơlơi hŭi rơhyưt hơget ôh, lăi biă yơh anun. Ƀơi anai aka ƀu hơmâo tơlơi truh prong lơi”.

Ƀơi anăp bruă hơmâo lu wơ̆t lŏn pơpư̆ ƀơi tơring glông Kon Plong, kiăng mơnuih ƀôn sang huăi bral bơngăt, ăt ƀu dưi ngă amưng lơi, djŏp gong gai tơring čar Kon Tum hơmâo krăp lăng, hmư̆ hing, pơtô brơi hơdră pơgang tơdah hơmâo tơlơi truh kiăng ngă hơđong pran jua mơnuih ƀôn sang. Khă hnun, tui hăng ơi Nguyễn Hưũ Tháp, Kơ-iăng khua Jơnum min mơnuih ƀôn sang tơring čar Kon Tum, tơlơi tơnap hloh ră anai lĕ aka ƀu hơmâo anom bruă kơsem min dlăm kơ tơlơi truh lŏn pơpư̆ ƀơi kual anai, laih anun anai lĕ tơlơi truh lŏn adai ngă ƀu thâo lăi lui hlâo ôh, anun jing lơ̆m hơmâo tơlơi truh sư̆ rơbư̆ biă mă:

“Ăt git gai na nao hơdôm gơnong bruă, gong gai, tơring glông Kon Plong ngă hrŏm kơjăp hăng hơdôm Anom kơsem min boh thâo či krăp lăng, pơgang tơlơi truh lŏn pơpư̆. Tơring čar Kon Tum aka ƀu thâo đơi ôh bruă wai lăng hăng pơgang tơlơi truh lŏn pơpư̆. Rơkâo anom git gai bruă dêh čar pơgang tơlơi truh lŏn adai ngă lăng ba hloh djru ba tơring glông đah mơ̆ng dưi lăi pơthâo hlâo, thâo pơgang tơdah hơmâo tơlơi truh lŏn pơpư̆  ƀơi tơring čar”.    

Tui hăng tơlơi pơsit mơ̆ng Anom bruă Lăi pơthâo hlâo tơlơi truh lŏn pơpư̆ hăng pơhŭi hlâo ia rơsĭ bluk, Anom bruă Vật lý Địa cầu, amăng hơdôm rơtuh wơ̆t lŏn pơpư̆, lŏn tơtar ƀơi tơring glông Kon Plong, tơring čar Kon Tum mơ̆ng thun 2022 truh ră anai, tơlơi truh lŏn pơpư̆ kơtang hloh lĕ 4.7 đô̆ rơnuč blan 8 thun 2022. Tơdơi kơ hơmâo tơlơi lŏn pơpư̆ anai, Anom bruă git gai dêh čar kơ pơgang tơlơi truh lŏn pơpŭ čư̆ mơgơi hơmâo pơphun ngă lu bruă pơgang tơlơi truh kah hăng: hyu sem lăng; pơtô brơi ƀing khua ƀơi hơdôm boh să, tơring kual mơ̆ng tơring glông Kon Plong thâo pơgang tơlơi truh, pơtô pơgang tơlơi truh ia dăo, lŏn pơpư̆....

Khă hnun, truh ră anai aka ƀu hơmâo tơlơi kơsem min prong kơ phun tơhnal, tơlơi hŭi rơhyưt mơ̆ng tơlơi truh lŏn pơpư̆ ƀơi tơring glông Kon Plong, tơring čar Kon Tum kiăng hơmâo hơdră pơgang lăp djơ̆./.