Amăng rơbêh 1 ektar đang hmua mơng sang anŏ ơi Nguyễn Trung Đông, dŏ amăng thôn Chư Ty 4, să Đức Cơ, tơring čar Gia Lai, hơdôm glông lŏn čơđang ƀuh lu amăng đang pla kơphê. Hơdôm kual lŏn tơhlom trun, wŏt phun pla dong. Ơi Đông him lăng hơdôm rơtuh phun kơphê răm rai. Ñu bơngô̆t biă mă yua glông lŏn čơđang ƀuh mơng hơdôm thun hlâo anun, samơ̆ thun anai ăt ƀuh dong mơn, glăk prong tui tơdơi kơ hơjan prong. Hrŏm hăng đang hmua ơi Đông, ăt hơmâo đang hmua 2 boh sang anŏ pơkŏn amăng plơi pla ăt ƀuh kar kăi mơn, hăng glông čơđang glưh trun lĕ 1,5 km. “Lŏn tơhlom trun tong krah hmua truh 1 met 2 laih, ăt aka ƀu thâo ngă hiưm pă lơi. Ƀiă truh bơyan pĕ pơhrui mơ̆ ƀu khĭn mut amăng hmua. Glông lŏn tơhlom hơmâo akha phun kơphê bong glăi, ƀing gơmơi pơmĭn huăi hơget, samơ̆ yak nao amra ngă tơhlom trun, yua anun ƀu khĭn mut amăng hmua dong tah.”

Tui hơduah ĕp jang jai mơng Jơnum min mơnuih ƀon sang să Đức Cơ brơi ƀuh, kual lŏn tơhlom ƀơi Chư Ty 4 hơmâo ƀuh ngă sat kơ lŏn mơnai, ngă lŏn tơhlom trun kơtang hăng amra ƀuh lŏn tơhroh trun, bơdjơ̆ nao hơdôm ektar đang hmua kơ 3 boh sang anŏ. Jơnum min mơnuih ƀon sang să hơmâo guang dar pơhŭi hlâo mơnuih ƀôn sang, sit biă ñu ƀing čơđai anet, anăm nao jê̆ anih lŏn đang hăng anăm ba măi mok nao pơ anih lŏn tơhlom. Ơi Nguyễn Văn Tuyến, Khua Jơnum min mơnuih ƀon sang să Đức Cơ brơi thâo, să hơmâo hră pơ-ar rơkâo gơnong bruă ngă hmua hăng ayuh hyiăng tơring čar Gia Lai pơsit tong tơlơi ba truh, anih bơdjơ̆ sat hăng tơlơi ngă hŭi rơhyưt kiăng črâo ba anăm ngă hmua hăng ruah bruă pơsir pơhlôm rơnuk rơnua. “Kual lŏn anai hlâo anun tơring glông iâu Gonong bruă ayuh hyiăng lŏn mơnai nao ĕp lăng. Hơjan sui hrơi hăng hơdôm anih ƀuh lŏn đang, đa hơjan sui truh 2 blan mơtăm. Blung hlâo pơtô pơblang, pơhŭi brơi mơnuih ƀôn sang: lơm nao ngă hmua giăm anun kiăng răng kơđiăng, ƀu bưng băi bor tơkai trun anih lŏn tơhlom hŭi biă mă. Pơ anăp anai, să amra hơmâo hơdră pơsir, dưm kơƀang pơhŭi hlâo brơi mơnuih ƀôn sang.”

Lŏn tơhroh, lŏn tơhlom ƀơi kual Yŭ tơring čar Gia Lai ƀuh kơtang tui hơdôm thun giăm anai, sit biă ñu ƀơi hơdôm să Ia Krêl, Ia Ly hăng să Gào, bơdjơ̆ nao đang hmua hăng ngă răm rai jơlan glông. Ơi Nguyễn Vĩnh Khánh, Khua anom bruă wai lăng dơnao pơkŏng ia tơring čar Gia Lai brơi thâo, hăng hơdôm anih lŏn tơhlom bơdjơ̆ sat nao plơi pla, hơdôm boh ƀon lan rơkâo guang dar dưm kơƀang pơhŭi, sem lăng bruă pơkra hĭ kjăp ƀudah ba đuăi mơnuih ƀôn sang. Hăng đang hmua răm rai, Gơnong bruă ngă hmua hăng ayuh hyiăng rơkâo pel ĕp, jŭ yap glăi tong ten kiăng ngă pơphô bruă rơkâo djru brơi. “Ră anai, hăng hơdôm anih lŏn tơhlom, Gơnong bruă hơmâo hră pơ-ar mơ-it nao hơdôm boh ƀon lan pơhŭi hlâo kơ anŏ răm rai, hluai tui anun amra djru hơkrŭ bruă ngă hmua, Tơdơi kơ hơmâo anŏ răm rai mơng hơdôm boh ƀon lan mơ-it glăi, Gơnong glăi amra pơtum pơƀut glăi mơ-it nao gơnong bruă prăk kak kiăng hluai tui anun djru brơi hơdôm boh ƀon lan djru brơi tơlơi ngă hmua.”

Hrŏm hăng bruă djru blung a, bruă pel ĕp glăi tong ten hơdôm anih lŏn tơhlom, lŏn tơhroh amăng tơring čar Gia Lai amra djru brơi ƀon lan ƀơƀrư̆ ĕp hơdră pơsir hĭ lăp djơ̆ kiăng wai pơgang brơi anih dŏ hăng đang hmua kơ mơnuih ƀôn sang. Anai ăt lĕ atur phun kiăng neh met wa hơđong pran jua bơwih ƀong huă./.