Mơguah lơ 5/6, ƀơi mông pơphun ngă bruă, khua mua tơring čar Kon Tum lăi dlăm kơ tơlơi yôm mơ̆ng hrơi “Tê̆t pla kyâo djŏp rơnuk hơdor na nao kơ Wa Hồ” amăng bruă pơgang ba anih hơdip, ayuh hyiăng wơ̆t hăng boh tŭ yua mơ̆ phun pla ba glăi kơ tơlơi hơdip ană mơnuih ta; laih dong jak iâu abih bang gir pla kyâo ƀơi djŏp glông jơlan, pla amăng glai, djru ngă hiam glăi lŏn, pơgang adai không phang, huăi hơmâo lŏn čuah thar lu kar hăng tơlơi pơthâo mơ̆ng Hrơi ayuh hyiăng rŏng lŏn tơnah lơ 5/6 thun anai. Tơdơi kơ hơmâo pơphun, hrŏm hăng pla kyâo ter jơlan, tơring čar Kon Tum ăt pơphun pla 3.000 hektar glai. Amăng anun Jơnum min mơnuih ƀôn sang 10 boh tơring glông, plơi prong mơ̆ng tơring čar djru ba mơnuih ƀôn sang pla giăm 2.800 hektar laih anun rơbêh 200 hektar yua hơdôm anom bruă wai lăng glai gơgrong pla.

Mơguah lơ 5/6, ƀơi ƀôn prong Buôn Ma Thuột, tơring čar Dak Lak pơphun “Tê̆t pla kyâo hơdor na nao kơ wa Hô”. Anai ăt lĕ bruă mă anăp nao tal hơdor glăi 120 thun hrơi akŏ pơjing tơring čar Dak Lak, pơgôp ngă tui tơlơi dưi mơng jơlan hơdră “Pla ha klai kyâo mơtah” yua Kơnuk kơna pơphun.

Amăng hơdôm thun laih rơgao, djop gưl, djop gơnong bruă, gong gai ƀon lan, anih anom mă bruă hăng mơnuih ƀôn sang tơring čar Dak Lak hơmâo ngă tui, mut hrŏm amăng hơdôm tal pơphun pla kyâo hăng wai pơgang glai rưng.

Thun 2023, đơ đam tơring čar hơmâo pla rơbêh 4.500 ektar glai rưng, dưm dưm rơbêh 252% tui akŏ bruă. Plơi prong Buôn Ma Thuột lĕ sa amăng hơdôm boh plơi prong hơmâo phun kyâo lu hloh đơ đam dêh čar. Amăng hrơi pơphun Tê̆t pla kyâo mơguah lơ 5/6, ƀing khua mua hăng mơnuih ƀôn sang hơmâo pla hơdôm rơtuh phun băng lăng rôk tui jơlan Võ Nguyên Giáp. Tơdơi kơ hrơi pơphun, amra hơmâo 5 rơbâo phun kyâo amra pla pơhrua dong ƀơi hơdôm boh să hăng plơi prong.