Tŏ tui jơnum lok 6, Khul pơ ala mơnuih ƀon sang tơring čar Dak Nông tal IV tom brơi (6/7) pơčrông sai bruă pơđĭ kyar bơwih ƀong huă, mơnuih mơnam. Khua Jơnum min mơnuih ƀon sang tơring čar Dak Nông ơi Hồ Văn Mười lăi glăi tơlơi tơña mơng mơnuih ƀon sang hăng khua mua Khul pơ ala mơnuih ƀon sang tơring čar đing nao, sit biă ñu đing nao bruă mă bôxit, lŏn mơnai.

Lăi glăi tơlơi tơña mơng mơnuih ƀon sang hăng khua mua Khul pơ ala mơnuih ƀon sang tơring čar Dak Nông, ơi Hồ Văn Mười lăi nao 7 mơta bruă akŏ phun, sit biă ñu amăng pơđĭ kyar bơwih ƀong huă mơnuih mơnam amăng tơring čar 6 blan laih rơgao hăng pơ anăp dong. Amăng anun, bruă mă bôxit hơmâo lu khua mua Khul pơ ala mơnuih ƀon sang tơring čar lăi nao amăng mông jơnum. Khua Jơnum min mơnuih ƀon sang tơring čar Dak Nông brơi thâo, tui pel ĕp phrâo anai hloh, bôxit amăng tơring čar Dak Nông hơmâo dưm dưm 60% pơhmu hăng đơ đam dêh čar, anai lĕ tơlơi dưi amăng tơring čar. Samơ̆ tui tơlơi sit nik ră anai glăk bưp tơnap tap, gun găn. Truh ră anai ăt aka ƀu pơplih glăi yua anun 1.062 akŏ bruă amăng tơring čar glăk gun găn hăng bruă mă bôxit, amăng kual lŏm đơ đam giăm 6.700 ektar. Tơlơi anai ba truh kơ bruă djop tơlơi rơkâo, hơdră bruă tuh pơ alin amăng tơring čar Dak Nông khŏm pơdơi hĭ, tơlơi anai bơbeč sat nao bruă pơhưč tuh pơ alin.

Tom brơi (6/7), amăng mông tơña blung a ƀơi Tal jơnum lok 13, tal 12, rơwang bruă 2021-2026 mơ̆ng Khul khua pơ ala mơnuih ƀôn sang tơring čar Gia Lai, ƀing Khua pơ ala hmâo đing nao tơña lu tơlơi hang tơngia amăng bruă man pơdŏng ƀơi tơring čar. Amăng anun, tơlơi hơdôm homestay, anih anom pơdŏng sang ƀu djơ̆ phiăn pơkă hăng kaih ngă giong hơdôm tơlơi pơkă kual ƀơi hơdôm anih anom amăng tơring čar, jing anô̆ ngă gun tơlơi pơđĭ kyar hăng pok pơhai hơdôm rơwang bruă tuh pơplai.

Lăi glăi tơlơi tơña mơng khua pơ ala kơ bruă gơgrong mơng ƀirô wai lăng amăng bruă pioh lu homestay, kual pơdơi pơdă, anih mơñum kơ phê pơdong ƀu djơ̆ phiăn, ơi Nguyễn Bá Thạch – Khua Gơnong bruă man pơdong tơring čar Gia Lai lăi lĕ, bruă wai lăng kơnuk kơna kơ hơđong pơdŏng ƀơi lu anih anom amăng tơring čar hmâo tơlơi ƀu đing nao; lơm ring bruă pơdŏng ƀu djơ̆ phiăn giong kah mơng thâo, ba truh tơnap pơsir; tơlơi pơmin ngă tui mơng mơnuih ƀôn sang ƀu prong, lu mơnuih thâo soh samơ̆ rŏng ngă mơn, ba truh tơlơi tơnap, pơhrư̆i sui hrơi pơsir pioh glăi ring bruă ƀu djơ̆ phiăn.

Bruă sĭ mơdrô lŏn mơnai glăk “dong ha anih” samơ̆ tơlơi anai glăk hơmâo lu mơnuih lăi nao amăng jơnum lok 5, Khul pơ ala mơnuih ƀon sang tơring čar Kon Tum tal XII. Lu khua mua pơdah tơlơi bơngŏt tơlơi anai amra bơbeč nao kơtang kơ rơnoh pơhrui ngăn drăp amăng tơring čar thun anai. 6 blan akŏ thun, rơnoh prăk pơhrui mơng mă yua lŏn mơnai amăng tơring čar Kon Tum him lăng 90 klai prăk, dưm dưm 22,5% pơhmu hăng mrô pơkă.

Amăng jơnum bơkơtuai, khua mua Khul pơ ala mơnuih ƀon sang tơring čar, Khua git gai Ping gah tơring čar Kon Tum Nguyễn Đức Tuy brơi thâo, mơng anai truh rơnuč thun dŏ lu tơlơi lông, prăk pơhrui mơng lŏn mơnai ăt hrŏ trun dong. Kiăng pơsir tơlơi tơnap tap brơi kơ bruă sĭ mơdrô lŏn mơnai tŏ tui hơđong pơhrui ngăn drăp, ngă gêh gal djop gơnong bruă bơdjơ̆ nao, tơlơi pơgôp hiăp mơng khua mua Khul pơ ala mơnuih ƀon sang tơring čar Kon Tum brơi thâo, kiăng pơplih nua lŏn mơnai tui tơlơi sit nik; hmao tlôn, hruă kjăp amăng bruă dưm dăp man pơdong; pơsir hĭ tơnap tap lơ̆m ngă tui tơlơi phiăn lŏn mơnai.