VOV4.Jarai-Ding jum Gru grua Pơrơguăt drơi jăn hăng Tuai čuă ngui ngă hrom lu ding jum pơkŏn pơtô pơčrâo brơi tum teč rĭm bruă či ngă pok bah amăng kơ tuai čuă ngui hăng pơkra hơdră tơlơi phiăn amăng rơwang hrơi kom pơ anăp. Anai lĕ, tơlơi pơtong glăi sit nik mơ̆ng Kơ-iăng Khua dêh čar ơi Vũ Đức Đam ƀơi mông jơnum kơ hơdră pok bah amăng bruă tuai čuă ngui lơ̆m pơblih mă bruă beč bal, hmar djơ̆, rơnuk rơnua, pel ĕp tŭ yua klin covid 19, lir hơbit kơ rĭm yak ngă bruă rŭ glăi bơwih ƀong huă mơnuih mơnam dêh čar.

Ƀơi mông jơnum, khua pơ ala djop ding jum, anom bruă hơmâo pơčrông sai tong ten kơ tơlơi kiăng tŭ ư hĭ bruă pok bah amăng kơ tuai čuă ngui, pơčrông sai tum teč rĭm črăn pok brơi kơ tuai jar kmar čuă ngui mơ̆ng lơ 15/3/2022. Klah čun ƀơi mông jơnum, Kơ-iăng Khua dêh čar, ơi Vũ Đức Đam lăi pơtong: Ră anai tui hăng hơdră mă bruă kah hăng tơđar phrâo, bong glăi rơnuk rơnua beč bal hmar lăp djơ̆ pel ĕp klin, ƀing ta khom glăm ba djơ̆ lăp mơ̆ng djop ding jum anom bruă ngă hrom tong ten, jao kơ Ding jum Gru grua Pơrơguăt drơi jăn hăng Tuai čuă ngui ngă pô pơlir hơbit hăng Ding jum ia jrao laih anun hơdôm ding jum pơkŏn hơmâo hră pơtô, pơčrâo brơi tum teč lăi pơthâo hăng Kơnuk kơna pioh pơsit kơ bruă ngă hră Visa.

Nay Jek Pơblang