Dong mơng hrơi ƀong tết truh ră anai, rĭm hrơi, anom bruă khăm pơjrao, sang ia jrao pơjrao čơđai muai tơring čar Gia Lai hơmâo tŭ mă mơng 150-200 čô čơđai ƀă tơlơi ruă bơdjơ̆ nao jơlan suă jua. Amai Rmah H’Blê, hrŏm hăng rơkơi ñu mơng să Dun, tơring glông Chư Sê, ba ană 10 blan nao khăm, ñu lăi:

“Ană kâo hơdôm hrơi hlâo anun ba nao pơjrao pơ tơring glông Chư Sê. Tơdơi kơ glăi mơng sang ia jrao ăt dŏ pơ-iă drơi mơn, truh mơmŏt mlăm duam, pơtuk, yua anun kâo ba ñu rai pơ anai (Sang ia jrao pơjrao čơđai Gia Lai) hơmâo khăm brơi. Ơi ia jrao ñu ruă bơbrah jơlan suă jua, blơi jrao glăi mơñum hăng rơkâo pot glăi khăm tơdơi kơ 2 hrơi dong. Ƀơi să gơmơi ăt hơmâo lu čơđai ruă hrup hăng anai”.

Ƀơi anăp kơ tơlơi tơnap tap hăng hơmâo lu tui mơnuih ƀă tơlơi ruă tui jơlan suă jua, lu mơnuih ƀôn sang ruah bruă tlâ̆o vaccine pơgang hơdôm kman duam hơdrăp. Ơi ia jrao Nguyễn Hồng Điệp, anom bruă tlâ̆o pơgang mơng sang khăm pơjrao Sydmec, phường Phù Đổng, plơi prong Pleiku brơi thâo, rĭm hrơi anom bruă hơmâo tŭ mă giăm 50 čô mơnuih nao tlâ̆o vaccine duam hơdrăp. Anai lĕ hơdră tŭ yua kiăng gơgrong amăng bruă pơgang tơlơi ruă tui jơlan suă jua glăk ƀuh lu tui ră anai:

“Lơm tlâ̆o vaccine pơgang duam hơdrăp amra ngă hrŏ trun mơnuih ba nao đih pơ sang ia jrao, hăng hơdôm nam ruă kơtang. Hrŏm hăng anun, hăng ƀing tha rơma, čơđai anet, mơnuih drơi jăn ƀu-ai buai, bruă tlâ̆o pơgang lĕ hơdră bruă pơgang brơi tơlơi suaih pral, tŭ yua kiăng djru brơi mơnuih duam ruă dưi pơgang kman duam hơdrăp, plai ƀiă ngă lar hyu virus amăng mơnuih mơnam”.

Thạc sĩ, ơi ơi ia jrao Từ Thị Mai Linh, kơ-iăng Khua sang ia jrao pơjrao čơđai Gia Lai brơi thâo, ayuh hyiăng rơ-ŏt rơ-ơ̆ sui hrơi tui ră anai lĕ anŏ ba truh kơ tơlơi ruă duam hơdrăp. Mah duam hơdrăp amra suaih mă tơdơi kơ hơdôm hrơi, samơ̆ hăng ƀing mơnuih amuñ ƀă tơlơi ruă kar hăng ƀing čơđai anet pơ yŭ 5 thun (sit biă ñu lĕ pơ yŭ 2 thun), mơnuih tha rơma, mơnuih ruă kă hăng ƀing ƀu-ai buai amra ba truh hơdôm nam ruă kơtang anun lĕ bơbrah kơsô̆, bơbrah jơlan suă jua, bơbrah hơtai boh, akŏ dlô, ruă amăng pruăi lia hăng đa ba truh djai brŭ mơtăm.

Ơi ia jrao Mai Linh pơhŭi hlâo, tơdah hmư̆ rơ-ơ̆ rơ-ŏt, duam pơ-iă drơi, ruă akŏ, gah amăng drơi jăn, mơnuih ƀôn sang kiăng nao pơ sang ia jrao khăm hăng pơčrang lăng tui tơlơi črâo ba. Laih dong, mơnuih ƀôn sang kiăng hơmâo hơdră pơgang kiăng pơhlôm brơi tơlơi suaih pral:

“Duam hơdrăp lĕ yua virus ngă, yua anun, anăm blơi jrao pơjrao suaih hlao mơ̆ kiăng pơjrao tui hơdôm anŏ pơglăi hăng nam ruă bơdjơ̆ nao jơlan suă jua. Yua anun, bruă pơgang lĕ hơdră bruă yôm phăn hloh. Blung hlâo, kiăng pơagaih ƀơi adung, kông đok, mơñum ƀong brơi klă kiăng drơi jăn dưi pơgang kman, dŏ hơdip amăng anih agaih rơnăk hăng kiăng nao tlâ̆o vaccine duam hơdrăp hrŏm hăng hơdôm djuai vaccine pơgang pơkŏn”.

Ayuh hyiăng rơ-ŏt rơ-ơ̆ amra ngă lar hyu kman duam hơdrăp (arăng juăt iâu lĕ virus tui jơlan suă jua). Thun anai, ƀơi kual Dap kơdư, ayuh hyiăng glăk pơplih, mah yak nao bơyan bơngua laih samơ̆ ăt dŏ rơ-ŏt sui hrơi, mrô čơđai ƀă tơlơi ruă tui jơlan suă jua amăng tơring čar ăt glăk lu tui mơn.

Tui Thạc sĩ, ơi ia jrao Từ Thị Mai Linh-Kơ-iăng Khua sang ia jrao pơjrao čơđai Gia Lai, duam hơdrăp ăt dưi suaih mă tơdơi kơ hơdôm hrơi samơ̆ tơlơi ruă anai ăt ngă hŭi rơhyưt brơi tơlơi suaih pral hăng ăt dưi ngă djai mơnuih, sit biă ñu hăng ƀing mơnuih amuñ bơdjơ̆ nao anun lĕ: Ƀing čơđai pơ yŭ 5 thun, sit biă ñu lĕ ƀing čơđai pơ yŭ 2 thun; mơnuih tha rơma, mơnuih ruă kă, mơnuih ƀu-ai buai, ƀing rơmông plin…Sa, dua nam ruă juăt ƀuh mơng duam hơdrăp anun lĕ: bơbrah jơlan suă jua, bơbrah kơsô̆, hơtai boh…ruă amăng blung pruăi, bơbrah dlô, kman ƀă amăng kơtăk drah….

Ơi ia jrao pơhŭi hlâo, ră anai, sa, dua čô mơnuih juăt ngă lơm duam hơdrăp anun lĕ blơi mă jrao mơñum mơ̆ ƀu hơmâo khăm, pơčrang lăng mơng ơi ia jrao, bruă anai amra ngă tơlơi ruă kơtang tui hăng bơdjơ̆ sat nao tơlơi suaih pral. Yua anun, lơm mưn duam hơdrăp anun lĕ rơ-ŏt, ƀu-ai buai, duam pơ-iă, ruă akŏ, gah amăng drơi jăn…mơnuih ƀôn sang kiăng nao pơ sang ia jrao khăm hăng pơjrao brơi tui tơlơi črâo ba mơng ơi ia jrao. Duam hơdrăp dưi pơgang hăng bruă tlâ̆o vaccine. Anai lĕ hơdră pơgang tŭ yua kiăng huăi duam hơdrăp hăng hơmâo hơdôm nam ruă kơtang mơng tơlơi ruă anai. Mơnuih ƀôn sang kiăng gơgrong nao tlâ̆o vaccine kiăng pơgang./.