VOV4.Jarai - Mơguah lơ 26/8, Ƀirô tơhan polih pel ĕp kơđi tơlơi Kông ang tơring čar Lâm Đồng hmâo pơtrun mă 2 čô mơnuih mă bruă ƀơi Anom wai lăng tơlơi duam ruă tơring čar Lâm Đồng kiăng pel ĕp, ngă rơđah bruă hưp ƀong kông ngăn. 2 čô mơnuih hmâo mă anun krư̆ 4 blan lĕ Phạm Thị Hoa hăng ơi Nguyễn Xuân Đạt, glăk mă bruă ƀơi Anom wai lăng tơlơi duam ruă tơring čar Lâm Đồng.

Ƀirô tơhan polih ngă tui bruă pơtrun pel ĕp anih mă bruă mơng yă Hoa hăng ơi Đạt

Lom ngă tui bruă jao amăng tal hmâo klin Covid-19 ngă kơtang mơng krah truh rơnuč thun 2021, 2 čô anai hmâo laih bruă ngă ƀlor kiăng hưp ƀong 600 klăk prăk. Rơđah biă ñu, wot 2 gơñu hmâo ngă mă ča măi mok, sinh phẩm pơčrang kơman. Hrom hăng anun, pơčrang kơman ƀu pơplih samơ̆ lăi pơthâo amăng hră pơ-ar lĕ ngă mă ha sa đôč, tơdơi kơ anun sĭ glăi sinh phẩm, kit test hăng hơdôm gơnam pơčrang lăng kơman rơbêh kơ Sang bruă Việt Á kiăng mă prăk. Ră anai kơđi tơlơi glăk dưi hmâo Kông ang tơring čar Lâm Đồng pel ĕp, pơhư prong./.

Siu H’ Prăk: Pơblang