Amăng hră lăi pơthâo Ƀirô Khua pơ ala mơnuih ƀôn sang dêh čar, Kơ-iăng khua dêh čar ơi Lê Minh Khái brơi thâo, hơdôm blan akŏ thun 2024, tơlơi bơwih ƀong huă pok prong pơhlôm hơđong, prăk trun nua hơmâo pơgang hĭ. Rơnoh GDP amăng rơwang tal I-2024 dưm dưm 5,66%, lu hloh amăng rơwang mơng thun 2020-2023. Yap truh abih thun 2023, hơmâo mă yua giăm 680 rơbâo klai prăk kiăng pok pơhai ngă tui hơdră apah prăk phrâo. Kơ bruă jao hăng hơdră bruă phun, Kơ-iăng khua dêh čar hơmâo lăi nao 11 mơta bruă jao, hơdră bruă pok pơhai ngă tui pơ anăp anai, amăng anun, đing nao pơtrut pơđĭ kyar pơlir hăng hơđong tơlơi bơwih ƀong huă pok prong, gum hrŏm kjăp, tŭ yua, lăp djơ̆ hơdôm hơdră git gai wai lăng bơwih ƀong pok prong.

Hrŏm hăng anun, tŏ tui pơgiong anih anom mă bruă tong ten, tơpă, tŭ yua, klă hloh; pơplih phrâo amăng wai lăng mơnuih apăn bruă, pơjing mơnuih apăn bruă rơgơi, tơpă, pơhlôm djru brơi abih bang mơnuih ƀôn sang; pok pơhai bruă apah prăk phrâo dong mơng lơ 1/7.