VOV4.Jarai - Mơguah anai, ƀơi Hà Nội, pok phun jơnum tal 7 mơng Jơnum min apăn bruă Khua pơ ala mơnuih ƀôn sang dêh čar ta. Amăng mông jơnum anai, Jơnum min apăn bruă Khua pơ ala mơnuih ƀôn sang dêh čar ta amra gum pơhiăp amăng lu bôh yôm phăn. Bơ̆ bruă pơdŏng tơlơi phiăn, amăng mông jơnum anai, Jơnum min apăn bruă Khua pơ ala mơnuih ƀôn sang dêh čar ta gum pơhiăp kơ: Bruă lăi pơblang, tŭ mă, pơplih pơkra rơwang bruă Tơlơi phiăn Bơkơtưn, apah pri bơni (pơplih pơkra); rơkâo pơhrua nao tơlơi čih pơkra Tơlơi pơtrun pơsit mơng Khua pơ ala mơnuih ƀôn sang dêh čar pơphô hlâo hơdră pơphun mơnuih mă bruă, anăp bruă mă, pơtô bruă mă kơ mơnuih ngă soh gah rơngiao kơ sang mơnă amăng Jơlan hơdră pơdŏng tơlơi phiăn, phiăn pơtrun thun 2022; pel ĕp, pơsit bruă ngă tui sum ao pơsir kơđi mơng Khul phăt kơđi. Bơ̆ tơlơi bơwih ƀong – mơnuih mơnam, Jơnum min apăn bruă Khua pơ ala mơnuih ƀôn sang dêh čar ta gum pơhiăp bruă pơhrua nao kơčăo buă tuh pơplai prăk mơng dêh čar tač rơngiao mơng mrô prăk akă pơpha hyu hăng pơplih pơkra, pơkă hlâo kơčăo bruă tuh pơplai bruă găp ƀrô ngăn drăp Kơnuk kơna mơng thun 2021-2025 kơ anăn păn rơwang bruă mơng hơdôm ding jum, ƀirô kơnuk kơna hăng tơring čar ƀôn prong tal 2. Hrom hăng anun, amăng mông jơnum anai, Jơnum min apăn bruă Khua pơ ala mơnuih ƀôn sang dêh čar ta amra pel ĕp tơlơi lăi pơthâo bruă mơnuih ƀôn sang kiăng blan 12/2021 mơng Khua pơ ala mơnuih ƀôn sang; Akô̆ bruă dưm dăp hơdră pơphun amăng lăm hăng ngă tui phiăn pơkă mơng Anom bruă Khua pơ ala mơnuih ƀôn sang hăng gum pơhiăp kơ klah čun tal jơnum ƀu hmâo pơkă hlâo tal sa, Khua pơ ala mơnuih ƀôn sang tal 15./.

Siu H’ Prăk: Pơblang