VOV4.Jarai - Ngă lơphet 97 thun Hrơi hră pơhing hơkrŭ Việt Nam, mơmot anai, Ngă lơphet jao pri tơlơi pơhing phrâo dêh čar tal 16 thun 2021 hơmâo pơphun prong ƀơi Hà Nội. Anai jing bruă prong ngă pơhưč lu mơnuih lăp đing nao, biă ñu ƀing hyu mă tơlơi pơhing amăng đơ đam dêh čar. Mơng 2 rơbâo tơlơi pơhing hơmâo pơplông, hăng lu tal ruah mă, Grup čŏm puang pơsit brơi pri: 10 pri A, 22 pri B, 48 pri C, 35 pri pơtrut pran jua kơ ƀing čih tơlơi pơhing, grup čih tơlơi pơhing rơgơi hloh. Hơdôm tơlơi pơhing hơmâo ba pơpông tal anai lăi nao klă, djŏp tơlơi pơhing gah bruă čar, biă ñu bruă klin kheng Covid-19 jing gru rơđah pơƀuh anŏ gir kơ bruă, mut nao amăng anih hơmâo klin mơng ƀing hyu mă tơlơi pơhing. Lu tơlơi čih brơi ƀuh anŏ klă bơdjơ̆ nao mơnuih mơnam, hơmâo hơdôm anom apăn bruă hmư̆ tui, pơsir brơi, mơnuih ƀon sang bơni.

Siu H’Mai: Pơblang