VOV4.Jarai - Thun 2021, Dak Lak hơmâo gơgrong găn rơgao sa thun hơmâo lu tơlơi lông, glêh tơnap hăng ba glăi boh than prong prin, jing anŏ gơnang nao amăng thun 2022 anai hăng ngă tui tơlơi pơtrun mơng Jơnum Ping gah tơring čar tal XVII rơwang thun 2020-2025. Hương Lý, Pô mă tơlơi pơhing phrâo mơng Gong phun jua pơhiăp dêh čar Việt Nam anom bruă ƀơi kual Dap kơdư hơmâo mông bơră ruai hăng ơi Nguyễn Đình Trung, Ding kơna Ping gah dêh čar, Khua git gai Ping gah tơring čar Dak Lak kơ hơdôm boh than dưi ngă mơng Ping gah, gong gai hăng mơnuih ƀon sang djop djuai ania amăng tơring čar Dak Lak hrŏm hăng pran gir run ngă ha amăng plĕ amăng thun pơ anăp dong.

Ơ ơi Nguyễn Đình Trung, Ding kơna Ping gah dêh čar, Khua git gai Ping gah tơring čar Dak Lak, thun 2021 rơgao laih, anai ăt lĕ thun blung a tơring čar Dak Lak pok pơhai ngă tui tơlơi pơtrun mơng Jơnum Ping gah tal XVII hăng akŏ bruă bơwih ƀong huă-mơnuih mơnam 5 thun (2021-2025). Ih dưi lăi pơthâo mơn sa, dua boh than dưi ngă prong hloh ƀơi tơring čar Dak Lak amăng thun laih rơgao ?

Ơi Nguyễn Đình Trung: Thun 2021 bưp lu tơlơi tơnap tap mơng klin Covid-19 laih dong bơbeč sat mơng sa, dua bruă pơkŏn amăng tơring čar, Ping gah tơring čar, Khul apăn bruă Ping gah tơring čar hơmâo đing nao git gai djop gưl gong gai hăng mơnuih ƀon sang amăng tơring čar ngă klă amăng bruă pơgang klin hăng hơdôm bruă jao kiăng pơđĭ kyar bơwih ƀong huă mơnuih mơnam, bruă pơjing Ping gah, bruă pơjing anih anom kơđi čar hăng pran jua “jai bưp tơnap tap, tơlơi lông jai gum pơgôp, gir run pok pơhai ngă tui hơdôm bruă jao, hơdră bruă hơmâo ba tơbiă”. Boh than ba glăi amăng thun 2021, tơring čar dưi ngă ăt lu biă mă. Amăng pơđĭ kyar bơwih ƀong huă - mơnuih mơnam hơmâo 15/16 hơnong pơkă dưi ngă hăng rơgao hăng tơlơi pơkă hơmâo ba tơbiă. Amăng anun pơhưč rơnoh prăk tuh pơ alin him lăng rơbêh 42 rơbâo 100 klai prăk, dưm dưm 141% pơhmu hăng tơlơi pơkă hlâo anun. Pơhrui ngăn drăp kơnuk kơna rơbêh 8.200 klai prăk, dưm dưm 152% pơhmu hăng rơnoh jao trun. Mrô să dưi pơgiong hơnong pơkă plơi pla phrâo rơgao 2 boh să pơhmu hăng tơlơi pơkă hlâo anun. Amăng pơđĭ kyar bơwih ƀong huă ƀơi ƀon lan, bruă pơđĭ kyar apui lơtrik pơkra phrâo lĕ sa amăng hơdôm bruă yôm amăng tuh tia pơkra pơjing amăng tơring čar. Tơring čar hơmâo pơhưč tuh pơ alin 28 kơčăo bruă hăng rơnoh prăk amra mă yua lĕ rơbêh 24 rơbâo klai prăk. Lu kơčăo bruă phrâo dưi mă yua pơgôp pơtrut pơđĭ kyar bơwih ƀong huă-mơnuih mơnam amăng tơring čar. Thun 2021, bruă pơjing Ping gah, bruă pơjing anih anom kơđi čar ăt hơmâo đing nao hăng pok pơhai ngă ha amăng plĕ hăng ba glăi boh tŭ yua prong prin.

Ơi Nguyễn Đình Trung, Ding kơna Ping gah dêh čar, Khua git gai Ping gah tơring čar Dak Lak

Hnun hă, hrŏm hăng hơdôm boh than dưi ngă amăng pơđĭ kyar bơwih ƀong huă - mơnuih mơnam, bruă pơjing Ping gah, pơjing anih anom kơđi čar ăt hơmâo tơring čar Dak Lak đing nao pok pơhai ngă tui. Anai lĕ bruă tơnap tap, kiăng pơphun brơi tong ten, lăp djơ̆. Yua anun, yak nao thun tal 2 ngă tui tơlơi pơtrun mơng Jơnum Ping gah đơm đam dêh čar tal XIII hăng Jơnum Ping gah tơring čar tal XVII, bruă anai amra tŏ tui pơtrut ngă hiưm pă ñu, ơ ơi ?

Ơi Nguyễn Đình Trung: Tơlơi pơtrun mơng Ping gah tơring čar thun 2022 pơsit tong: “Tŏ tui pơtrut kơtang amăng bruă pơjing, pơplih pơkra amăng Ping gah tui hăng tơlơi pơtrun mơng gơnong glông tal IV, XII hăng XIII pơlir hăng bruă ngă tui tơlơi črâo trun mrô 05 hăng tơlơi pơsit mrô 01, lơ 18/5/2021 mơng Ding jum kơđi čar hăng sa, dua bruă yôm phun tui anai:

Tal sa, pơphun pok pơhai ngă tui tơlơi pơsit mrô 21, lơ 25/10/2021 mơng Khul apăn bruă Ping gah dêh čar amăng pơtrut pơjing, pơplih pơkra amăng Ping gah hăng anih anom kơđi čar. Gir run pơgăn, pơsir hĭ ƀing mơnuih apăn bruă Ping gah hơmâo tơlơi pơmĭn, hơdip ƀu klă ƀu hiam, hơmâo hơdôm bruă ngă soh.

Dua dong lĕ, pơjing mơnuih apăn bruă Ping gah thâo rơgơi, hơdip hiam, đăo gơnang amăng bruă jao. Pơplih phrâo, dưm dăp glăi anih anom mă bruă brơi kơ tŭ yua hloh amăng anom kơđi čar pơlir hăng bruă pơpha mơnuih mă bruă brơi djơ̆. Dưm dăp glăi ƀing mơnuih apăn bruă hăng ruah ĕp brơi bruă mă.

Tlâo lĕ, pơplih amăng bruă mă, hrưn đĭ klă dong lơ̆m git gai bruă mă mơng hơdôm khul grup Ping gah, mơnuih apăn bruă Ping gah. Amăng anun pơdah pran gơgrong ba jơlan hlâo, ba gru tui pran gơgrong mơng mơnuih apăn bruă Ping gah. Pơtrut amăng bruă pel ĕp, krăo lăng, ngă tui djơ̆ tơlơi pơkă…

Pă lĕ, klă ƀiă dong amăng bruă pơgăn, tañ ĕp ƀuh bruă bưp ƀong kông ngăn, pơgăn tui ƀơƀrư̆ bruă hưp ƀong kông ngă, yua gơnam khưi khai. Tañ amăng bruă pel ĕp, pơsir kơđi tơlơi. Biă mă ñu lĕ hơdôm kơđi hưp ƀong kông ngăn lu mơnuih đing nao.

Bruă rơnuč lĕ, Jơnum min djop djuai ania mơnuih mơnam Việt Nam hăng hơdôm khul grup kơđi čar, mơnuih mơnam kiăng kơ ngă tui hơdôm tơlơi gơgrong amăng krăo lăng, mut hrŏm pơgôp hiăp kiăng pơjing Ping gah, pơjing gong gai, pơjing mơnuih apăn bruă Ping gah lơ̆m gơgrong ngă tui hơdôm bruă jao.

Amăng thun blan klin Covid-19 glăk dŏ ngă tơnap tap, kiăng kơ pơhlôm amăng bruă pơgang klin klă hloh, laih dong pơhlôm pơđĭ kyar bơwih ƀong huă - mơnuih mơnam hăng dưi ngă pơgiong hơdôm hơnong pơkă tui tơlơi pơtrun mơng Jơnum Ping gah djop gưl ba tơbiă, Khul apăn bruă Ping gah Ping gah tơring čar Dak Lak hơmâo hơdră bruă, tơlơi git gai hiưm pă pơ anăp anai, ơ ơi ?

Ơi Nguyễn Đình Trung: Thun 2022 him lăng klin kheng ăt dŏ ngă tơnap tap. Yua anun, Khul apăn bruă Ping gah tơring čar hơmâo tơlơi črâo trun mrô 16 kơ bruă git gai amăng bruă git gai amăng pơgang klin Covid-19 lơ̆m pok glăi hơdip hrŏm hăng klin kiăng kơ git gai djop anih anom kơđi čar pok pơhai hơdôm bruă jao amăng pơgang klin. Amăng anun pơsit tong bruă yôm phun anun lĕ:

Sa lĕ gơgrong kiăo tui tơlơi sit nik kiăng kơ hmao tlôn git gai, črâo ba ngă tui hơdôm hơdră kiăng hloh, lăp djơ̆ kiăng huăi sư̆ rơbư̆ tơdah hơmâo tơlơi hơget, anăm brơi anih anom ia jrao gơniă mơnuih nao khăm pơjrao.

Dua dong kơtưn amăng bruă git gai pôr pơhing, pơtô pơblang kiăng kơ mơnuih ƀon sang kơđiăng dong amăng bruă pơgang klin Covid-19.

Tlâo lĕ, đing nao git gai Ping gah tơring glông, Ping gah plơi prong hăng hơdôm anom bruă Ping gah, djop anih anom prap lui hơdră bruă kiăng pơhlôm amăng pơgang klin. Sit biă ñu amăng bơyan čơkă thun phrâm Nhâm Dần anai.

Pă lĕ, tŏ tui ngă tui khăt khăt tơlơi pơtrun mrô 128  mơng Kơnuk kơna hăng akŏ bruă mơng Ding jum ia jrao ăt kah hăng Jơnum min tơring čar. Amăng anun lăng glăi djơ̆, hmao tlôn klin kheng kiăng kơ hơmâo hơdră pơgang pơgăn lăp djơ̆ hăng tơlơi sit nik ră anai. Pơhlôm ngă tui klă hơdôm bruă pơgang klin mơng anun pơgôp pơđĭ kyar bơwih ƀong huă mơnuih mơnam ƀơi ƀon lan.    

Hai! Bơni kơ ih hŏ!

Hương Lý: Čih

Siu Đoan: Pơblang