VOV4.Jarai - Mơguah lơ 11/5, ƀơi Sang mă bruă, Pok phun jơnum lok 11 mơng Jơnum min apăn bruă Khua pơ ala mơnuih ƀôn sang dêh čar. Amăng mông jơnum anai, Jơnum min apăn bruă Khua pơ ala mơnuih ƀôn sang dêh čar gum pơhiăp kơ 11 bôh yôm. Amăng anun, lăp đing nao lĕ tơlơi lăi pơthâo kơ bruă bơwih ƀong – mơnuih mơnam hăng ngăn drăp kơnuk kơna thun 2021 hăng tơlơi ngă tui hơdôm blan akô̆ thun 2022. Biă ñu, amăng mông jơnum anai, Jơnum min apăn bruă Khua pơ ala mơnuih ƀôn sang dêh čar gum pơhiăp kơ bruă lăi pơthâo kơ Khua pơ ala mơnuih ƀôn sang pel ĕp, pơsit hơdră pơtrun tuh pơplai Rơwang bruă kơtuai guai 4 kual plơi prong jưh jom Hà Nội, Rơwang bruă kơtuai guai 3 bôh ƀôn prong Hồ Chí Minh; Rơwang bruă pơdŏng ring bruă jơlan đuăi hmar Châu Đốc – Cần Thơ – Sóc Trăng; Rơwang bruă Khánh Hoà – Buôn Ma Thuột; hăng Rơwang bruă Biên Hòa – Vũng Tàu. Anai lĕ hơdôm rơwang bruă yôm phăn gah Khua pơ ala mơnuih ƀôn sang pơsit pơtrun tuh pơplai, hmâo mă yua lu ngăn drăp dêh čar, tơring čar, ƀôn prong, prăk tuh pơplai bruă hrom găp ƀrô hăng prăk pơtrut bơwih ƀong./.

Siu H’ Prăk: Pơblang