Tŏ tui mông jơnum tơña hăng lăi glăi ƀơi mông jơnum lok 7 mơ̆ng Ƀirô khua pơ ala mơnuih ƀôn sang dêh čar, mơguah lơ 5/6, Khua ding jum tuh tia pơkra gơnam hăng sĭ mơdrô ơi Nguyễn Hồng Diên lăi rơđah phun tơhnal bruă pơkra măi mok amăng dêh čar ta aka ƀu djơ̆ hăng tơlơi kiăng, anun lĕ yua tơlơi hơmâo, mơnuih mă bruă, hơdră pơhưč tuh pơ alin mơ̆ng dêh čar tač rơngiao FDI. Laih dong, Khua ding jum ăt ngă rơđah hơdră djru ba anom bơwih ƀong ba sĭ gơnam pơ čar rơngiao hrơi blan pơ anăp, đah mơ̆ng mơneč mă djŏp tơlơi gêh gal mơ̆ng hră kĭ pơkôl sĭ mơdrô rơngai rơnuk phrâo.

Pơhiăp pơđut mông jơnum gah bruă tuh tia pơkra gơnam sĭ mơdrô, Khua git gai pơ ala mơnuih ƀôn sang dêh čar ơi Trần Thanh Mẫn pơsit, bruă tơña hăng lăi glăi tơlơi tơña pơphun klă biă mă laih. Hơmâo laih 40 wơ̆t ƀing khua tơña hăng 6 čô khua bơkơtuai, bơrơjah nao rai. Khua ding jum tuh tia pơkra gơnam hăng sĭ mơdrô lăi glăi djŏp laih tơlơi tơña mơ̆ng ƀing khua pơ ala. Mơ̆ng mông tơña anai, rơkâo Kơnuk kơna, Khua ding jum tuh tia pơkra gơnam hăng sĭ mơdrô wơ̆t hăng hơdôm Ding jum anom bruă bơdjơ̆ nao ngă tui tŭ yua djŏp hơdră ba tơbiă, amăng anun ngă giong tơlơi phiăn bơdjơ̆ nao sĭ mơdrô điện tử, pơgang ba mơnuih blơi gơnam; pơtrut bruă sĭ mơdrô, pok prong, ngă hrŏm hăng lu anih sĭ mơdrô ƀơi jar kmar hrŏm hăng pơđĭ tui anŏ klă mơ̆ng gơnam tam.