Lơ 8/6, Jơnum lok 5, Khua pơ ala mơnuih ƀon sang dêh čar tal XV hơmâo pơgiong hiam klă mông tơña hăng lăi glăi hăng 4 mơta bruă hơmâo ba nao tơña, tui tơlơi git gai wai lăng mơng hơdôm ding jum: Bruă mă, tơhan rơka hăng mơnuih mơnam, Boh thâo măi mok phrâo, wai lăng jơlan glông hăng Jơnum djuai ania. Hrŏm hăng ƀing khua ding jum, gơnong bruă gơgrong lăi glăi, 3 čô kơ-iăng khua dêh čar: Lê Minh Khái, Trần Lưu Quang, Trần Hồng Hà, Khua ding jum hơmâo Ding jum prăk kak; kơčăo bruă hăng tuh pơ alin; Ngă hmua hăng pơđĭ kyar ƀon lan ăt lăi glăi tơlơi tơña, ngă rơđah dong hơdôm boh tơhnal bơdjơ̆ nao.

Khua git gai pơ ala mơnuih ƀon sang dêh čar ơi Vương Đình Huệ sem lăng, lăi glăi tơlơi tơña pơphun amăng hrơi mông hur har tơpă sit, pơhưč lu mơnuih đing nao mơng abih bang mơnuih đơ đam dêh čar. Ƀing khua ding jum mah mơnuih sui thun mă bruă ƀudah phrâo lơ̆m lăi glăi tơlơi tơñu tal blung a lêng pơdah tơlơi thâo thăi, thâo rơđah hơdôm bruă ƀing gơñu wai lăng, ăt lăi glăi tơpă, huăi hơngah, plŏm hĭ, mah hơdôm bruă tơnap tap.