Hmư̆ hing Khua git gai Ping gah dêh čar ơi Nguyễn Phú Trọng rơngiă, ƀing apăn bruă Ping gah hăng abih bang mơnuih ƀôn sang amăng tơring čar Tiền Giang ol kơdol pran jua, hning rơngŏt biă mă, hăng brơi thâo anai lĕ tơlơi rơngiă prong biă mă hăng Ping gah, khul ling tơhan hăng abih bang mơnuih ƀôn sang. Ơi Lê Trường Sơn, Kơ-iăng khua khul pơ ala mơnuih ƀôn sang tơring glông Tân Phước - Kual Đồng Tháp Mười mơng tơring čar Tiền Giang brơi thâo:

“Kâo ol kơdol pran jua hăng hning rơngŏt biă mă lơm hmư̆ hing Khua git gai Ping gah rơngiă. Ñu lĕ khua phun akhan amăng rơnuk tŭ tă ră anai, ñu ăt lĕ mơnuih kiăo tui hrăm wa Hô rơgơi, hơdip hiam klă, sa čô mơnuih Cộng sản lêng hơdip tơpă sit. Khua git gai Ping gah dêh čar lĕ khua ngă bruă kơđi čar lêng kơ kiăo tui jơlan gah, bruă mă tui hơnong pơkă, tơlơi pơmĭn, pơgăn hưp ƀong kông ngăn kiăng wai pơgang tui tơlơi pơmĭn hrŏm, hmư̆ ñu rơngiă kâo ăt ƀlĕ ia mơta mơn”.

Đại đức Thích Minh Phước, git gai Sang phơ̆t Liên Hoa ƀơi să Xuân Đông, tơring glông Chợ Gạo, tơring čar Tiền Giang hrŏm hăng ƀing yă yơng ơi phơ̆t amăng tơring čar hning rơngôt biă lơm hmư̆ hing pô git gai lŏn ia rơngiă:

“Hăng drơi pô kâo lĕ mơnuih tui đăo phơ̆t lơm hmư̆ hing Wa Khua git gai Ping gah Nguyễn Phú Trọng rơngiă. Khă thâo anun lĕ tơlơi anun amra truh hai samơ̆ hăng drơi pô kâo ƀuh hning rơngôt biă lơm lŏn ia rơngiă sa čô khua git gai rơgơi mơbruă, ha pran jua hăng Ping gah, hăng mơnuih ƀôn sang. Ñu hmâo mă bruă laih kơ Lŏn ia truh tơ̆i pran. Lăp pơpŭ hăng ư-ang biă. Kâo hơdor na nao bôh pơhiăp mơ̆ng Ñu hmâo lăi: "Rơnuk mơnuih kơnong kơ sa wot, khom hơdip hiưm hơpă hmâo bôh tŭ yua pioh huăi ruă pran jua, ƀlok glăi kơ hơdôm bruă pô mă ƀu klă, ƀu hiam. Prăk kak lu hơget či ngă?. Djai ƀu thâo djă ba mơn. Anăn păn hing ang kah jing tơlơi yôm phăn hloh". Khă Wa rơngiă laih pioh glăi mơnuih ƀôn sang Việt Nam kiăng nao pơ̆ dêh čar ơi yă đưm samơ̆ bruă ngă hơkrŭ hăng hơdôm tơlơi pơhiăp bă kơ bôh tŭ yua dơlăm pran jua ană mơnuih mơ̆ng ñu pioh glăi kơ mơnuih ƀôn sang rơnuk ră anai hăng pơgi kơdih amra hơdor na nao. Pơpŭ bơni ƀơi anăp bơngăt jua wa Khua git gai Ping gah Nguyễn Phú Trọng".

Lăi nao Khua git gai Ping gah dêh čar ơi Nguyễn Phú Trọng, ơi Nguyễn An Chiến, mơnuih apăn bruă Ping gah pơdơi lơtret laih dŏ ƀơi phường Cốc Lếu, plơi prong Lào Cai brơi thâo, Khua git gai Ping gah dêh čar ơi Nguyễn Phú Trọng lĕ sa čô mơnuih kiăo tui hrăm Khua mir sir Hồ Chí Minh rơgơi hloh, lĕ sa čô mơnuih Cộng sản hơdip tơpă sit, ha rơnuk hơdip abih pran jua ngă tui tơlơi pơtrun mơng Ping gah, abih pran jua ngă bruă dêh čar, djuai ania. Sit biă ñu, lơm dŏ mă bruă, Khua git gai Ping gah dêh čar ơi Nguyễn Phú Trọng lĕ sa amăng ƀing khua mua rơgơi hloh amăng bruă pơgăn hưp ƀong kông ngă, bruă ngă soh.

“Lơm hmư̆ hing ñu rơngiă, ƀing gơmơi ol kơdol pran, hning rơngŏt biă mă lơm Ping gah hăng kơnuk kơna ta rơngiă sa čô mơnuih rơgơi kơhnâo, sa čô khua git gai rơgơi hăng tơlơi pơmĭn prong, sa čô mơnuih ngă bruă kơđi čar, ling tơhan, pơtom hiăp rơgơi amăng rơnuk hơkrŭ pơjing lŏn ia Việt Nam.