Jơnum hơmâo 55 tơlơi čih mơng ƀing rơgơi kơhnâo hăng ƀing wai lăng, ƀing čơđai sang hră pơtô kơđi čar dêh čar Hồ Chí Minh, hơdôm anom bruă kơsem min, hơdôm sang hră pơtô kơđi čar, hrŏm hăng khul grup kơđi čar-mơnuih mơnam amăng tơring čar Gia Lai hăng hơdôm boh ƀon lan amăng kual Dap kơdư. Hơdôm tơlơi čih lêng kơ pơsit tong tơlơi gơgrong yôm phun mơng mơnuih arăng đăo gơnang amăng plơi pla, mơng pơtô pơblang, pơtrut pơsur mơnuih ƀôn sang mut hrŏm pơđĭ kyar bơwih ƀong huă-mơnuih mơnam, man pơdong plơi pla phrâo, hơkrŭ glăi bruă kơđi čar ƀơi ƀon lan, tŏ tui pran gum pơgôp djop djuai ania; pơgang rơnuk rơnua, hơđong amăng mơnuih mơnam ƀơi ƀon lan.

Lu khua mua brơi thâo, kiăng mơnuih arăng đăo gơnang tŏ tui tơlơi gơgrong, kiăng ngă gêh gal kiăng mơnuih arăng đăo gơnang mut hrŏm amăng bruă kơđi čar-mơnuih mơnam amăng ƀon lan, pơtô pơjuăt, črâo ba kiăng hrưn đĭ klă dong, sit biă ñu amăng bruă krăo lăng, hmư̆ tơlơi lăi glăi amăng mơnuih mơnam hăng pơtrut pơsur mơnuih ƀôn sang ƀơi plơi pla ala ƀon.