Sang ataih mơng dơnao pơkŏng ia Dak N’ting giăm 500 met pơ bah dơnao, ayong K’Thu, djuai ania M’nông, dŏ amăng plơi Quảng Tiến, să Quảng Sơn, glăk ba ană bơnai nao dŏ pơ sang ơi yă tong krah să kiăng pơhlôm hlâo hŭi dơnao pơčah. Kơnong hơjăn ayong K’Thu dŏ glăi wai lăng sang, ngă hmua hăng ñu pô ăt bơngô̆t mơn.

“Neh met wa dŏ hơdip pơ bah dơnao lêng kơ bơngô̆t soh, hơjan hlim tui anai amuñ ngă pơčah dơnao. Rơkâo djop gưl gong gah tơdah ƀu dưi pơkra ming, bư̆ pơkra glăi hơdôm anih lŏn tơhroh, khŏm phă hĭ dơnao anai kiăng neh met wa huăi bơngô̆t. Mơ̆ pioh dơnao răm rai tui anai, tơdah dơnao pơčah amra ngă ia kor lu sang anŏ hơdip ƀơi anai”.

Ơi Vũ Tiến Lư, Khua git gai Ping gah tơring glông Dak Glong, tơring čar Dak Nông brơi thâo, blan 8/2023, tơdơi kơ ƀuh lŏn tơhroh, đang ƀơi bơnư̆ pơkŏng ia Dak N’ting, să Quảng Sơn, tơring glông hơmâo pok pơhai ba đuăi 34 boh sang anŏ dŏ hơdip pơ bah. Tơdơi kơ anun, mơnuih ƀôn sang pot glăi dŏ hơdip hăng ngă đang hmua. Ră anai, glăk amăng bơyan hơjan hlim dong, amuñ ngă pơčah dơnao biă mă, kiăng pơkra ming kah dưi pơhlôm brơi tơlơi hơdip kơ mơnuih ƀôn sang.

“Dơnao pơkŏng ia Dak N’ting 1 thun anai, ăt ƀuh mơn anŏ răm rai samơ̆ aka ƀuh thâo tong ten yua hơget. Yua anun, kâo ăt rơkâo gong gai tañ sem lăng glăi hăng pơkra ming dơnao anai”.

Bruă pơkra ming ring bruă dơnao pơkŏng ia Dak N’ting tơhroh hăng đang lĕ bruă ječ kiăng ngă mơtăm. Samơ̆, ơi Phạm Tuấn Anh, Khua gơnong bruă ngă hmua hăng pơđĭ kyar ƀon lan tơring čar Dak Nông brơi thâo, ăt dŏ sư̆ rơbư̆ hăng aka ƀu thâo tong ten yua hơget ngă răm rai kah hăng pơkra ming dơnao anai. Găn rơgao 1 thun samơ̆ aka ƀu thâo tong ten anai lĕ yua man pơkra ƀudah yua hơjan hlim. Tui ơi Phạm Tuấn Anh, ăt ƀuh hơmâo anom bruă man pơkra ƀu gưt nao pel ĕp kiăng kơ thâo tong ten yua hơget.

“Bruă tơnap tap hloh lĕ ĕp anom bruă sem lăng, kah hăng hơmâo prăk kak kiăng gơgrong kơ bruă anai. Lơm ngă bruă, ƀing gơmơi jak iâu lu anom bruă nao pel ĕp samơ̆ ƀing gơñu nao lăng giong đuăi hĭ, anun ngă kaih pơkra ming. Truh giăm anai anom bruă kơsem min dơnao pơkŏng ia kah mơng tŭ ư, ră anai ăt pơsit amra kĭ hră pơkôl kiăng gơgrong pơkra ming”.

Dơnao pơkŏng ia Dak N’ting tuh pơ alin man pơkra 137 klai prăk, mơng rơnoh prăk jơlan hơdră hơnong pơkă wai pơgang ayuh hyiăng hăng pơđĭ kyar mơtah rơwang thun 2016-2020 hăng rơnoh prăk mơng ngăn drăp ƀôn lan. Dơnao anai yua Khul wai lăng hơdôm ring bruă tuh pơ alin man pơdong tơring čar Dak Nông ngă pô tuh pơ alin. Akŏ blan 8/2023, dơnao anai ƀuh tơhroh, đang lơm pơkŏng bă ia. Khul git gai dêh čar kơ pơgang, pơgăn ayuh hyiăng pơplih sat yua Kơ-iăng Khua ding jum ngă hmua hăng pơđĭ kyar ƀon lan Nguyễn Hoàng Hiệp, Kơ-iăng Khua khul ba jơlan hlâo nao pel ĕp hăng git gai hơmâo hơdră ječ kah hăng pơhlôm sui pơ anăp. Jơnum min mơnuih ƀôn sang tơring čar Dak Nông ăt tŏ tui git gai ječ bruă sem lăng hăng pơkra ming dơnao ia, samơ̆ truh ră anai ăt aka ƀu dưi ngă. Ơi Hồ Văn Mười, Khua Jơnum min mơnuih ƀôn sang tơring čar Dak Nông brơi thâo, glăk ƀuh ngă kaih, ƀu glăm ba amăng pơkra ming dơnaong pơkŏng ia Dak N’ting.

“Jơnum kiăng črâo ba amăng hră pơ-ar, lăi lu wŏt mơ̆ ƀuh ngă, tơdah dơnao pơkŏng ia Dak N’ting pơčah amra bơdjơ̆ nao lu mơnuih, lơi pô amra glăm ba. Mơn rơbêh 1 thun anai laih, truh ră anai kah mơng hơmâo anom nao pel ĕp, sem lăng amăng bơyan hơjan, anai lĕ bruă glêh tơnap mơn”.

Gơnong glông git gai ječ, tơring čar pơtrut pơsur na nao, samơ̆ bruă pel ĕp hăng pơkra ming anih lŏn tơhroh, đang ƀơi dơnao ia Dak N’ting, să Quảng Sơn, tơring čar Dak Glong, tơring čar Dak Nông ăt dŏ gun. Lơm anun, amuñ ngă pơčah dơnao amăng bơyan hơjan hlim, bơdjơ̆ nao lu mơnuih hăng đang hmua pơ bah./.