Amăng hơdôm hrơi rơgao, hmư̆ hing neh wa ƀơi hơdôm bôh tơring čar kual Kơdư dêh čar glăk gơgrong ba răm rai prong yua kơ hơjan ia ling dăo mơ̆ng kơthel tal 3 ba truh, amai Nguyễn Hồng Tố Diễm, dô̆ ƀơi plơi prong Plei Ku, tơring čar Gia Lai hmâo prăp lui sa dua mơta gơnam tam hăng ia hơdjă pioh djru neh wa kual ia ling dăo. Hơdôm gơnam tam dưi hmâo ñu ba nao pơ̆ anih tum pơƀut, dưm dăp rơguăt pioh tơguan rơdêh pơgiăng nao.

“Kâo hăng amai kâo mơ-ĭt gơnam kơ neh wa kual kơthel ngă, čang rơmang ƀing adơi ayong khă jơlan ataih ăt amra ba truh kơ neh wa mơn. Čang rơmang djop mơnuih amra djru kơ neh wa ƀơi hơdôm kual glăk gơgrong ba răm rai”.

Lar hyu pran jua klă “hla hnil gôm hla tơ̆i”, lu mơnuih ƀơi tơring čar Gia Lai ăt iâo pơthưr mơn mơnuih ƀôn sang, gơyut gơyâo gum pơčruh mì tôm, ia mơñum hăng ia jrao gun pioh mơ-ĭt nao gum djru mơnuih ƀôn sang kual ia ling dăo ngă pơ̆ hơdôm bôh tơring čar Kơdư. Ayong Võ Phi Hổ, pô sang rơdêh Phi Hổ, juăt đuăi nao rai mơ̆ng Gia Lai nao pơ̆ Đã Nẵng brơi thâo, mơ̆ng hrơi iâo pơthưr, amăng čơtlăm lơ 11/9, hmâo lu mơnuih thâo tơngia nao pơ̆ anih tum pơƀut pioh mơ-ĭt hơdôm mơta gơnam tam kiăng yua, gum djru lơm tơnap mơ̆ neh wa lu anih anom pơ̆ Kơdư dêh čar glăk găn rơgao.

“Kâo dŏng tơbiă iâo pơthưr pioh neh wa Gia Lai gum hrom ba hơdôm gơnam, pran jua khăp pap mơ̆ng neh wa Gia Lai anăp nao neh wa kual Kơdư dêh čar. Hrŏm hăng anun kâo ăt hluai tui gong gai plơi prong pioh mă tơdăng anih mă prăk apah rơdêh nao rai mơ̆ng Đang bơnga Đồng Xanh lĕ anih tum pơƀut gơnam yua kơ anih anom anai hmâo lan prong hăng rơdêh ƀu kom rơdêh pơgiang gơnam”.

Ăt amăng lơ 11/9 mơn, Ping gah tơring čar Gia Lai hmâo hră kông điêng tañ rơkâo hơdôm gưl Ping gah, anom bruă, tơring glông, plơi prong amăng tơring čar tañ pơphun iâo pơthưr gum djru, gum ba neh wa răm rai. Hơdôm hrơi pok phun mơ̆ng ră anai truh abih lơ 13/9/2024. Mơ̆ng prăk apah mơ̆ng anom bruă, Jơnum min djop djuai ania mơnuih mơnam dêh čar Việt Nam tơring čar Gia Lai ăt hmâo bơk laih prăk djru 400 klăk prăk mơ-ĭt truh neh wa hơdôm bôh tơring čar Kơdư dêh čar.

Ƀơi tơring čar Dak Lak, hăng hơdôm bruă mă rơđah, mơnuih ƀôn sang djop djuai ania ƀơi Dak Lak glăk hmâo hơdôm bruă mă gum djru hăng mơnuih ƀôn sang kual Kơdư dêh čar gơgrong ba răm rai prong yua kơ kơthel ngă, pơdah pran jua gum djru tơdruă, gum hrŏm hơbit khăp pap tơdruă mơ̆ng djuai ania Việt Nam. Ƀơi tơring glông Lak, sa amăng hơdôm bôh tơring glông tơnap tap mơ̆ng tơring čar Dak Lak, anih hmâo truh 66% lĕ mrô neh wa djuai ania ƀiă dô̆ hơdip mơda, neh wa glăk gum hrŏm đa pơčruh pran, đa pơčruh gơnam tam tañ ngă rai "ƀưh hra pơđom kiăng khăp” mơ-ĭt kơ  mơnuih ƀôn sang kual Kơdư lơm bưp tơnap. Neh wa ƀu huĭ kơ tơnap gui hơdôm rêu hơbơi ngu pô pla ba nao pơ̆ anih tum pơƀut pơ̆ sang Phơt Quảng Trạch, să Đăk Liêng, tơring glông Lak pioh gum djru.

Ƀơi Kon Tum, Grŭp apăn bruă Khul hlăk ai tơring čar Kon Tum iâo pơthưr hơdôm gưl Khul hlăk ai gum hrŏm rơbêh kơ 33.000 čô mơnuih amăng khul, tơdăm dra amăng tơring čar gum pơruh djru mơnuih ƀôn sang pơsir anô̆ răm rai yua kơthel ia ling dăo ngă. Tal gum pơčruh djru mơnuih ƀôn sang dưi hmâo Khul hlăk ai tơring čar Kon Tum ngă tui amăng 5 hrơi, mơ̆ng čơtlăm lơ 11/9 truh abih lơ 15/9. Tơdơi kơ pok phun hăng pran gum djru khăp pap abih bang mơnuih apăn bruă, mơnuih mă bruă čar, ƀirô Khul hlăk ai tơring čar Kon Tum hmâo mă yua hlâo gum hơgôp gum djru mơnuih ƀôn sang kual hơjan ia ling dăo ngă gah Kơdư dêh čar. Ayong Nguyễn Văn Mạnh, Kơ-iăng Khua git gai Khul hlăk ai tơring čar Kon Tum, brơi thâo:

“Grup apăn bruă Khul hlăk ai tơring čar ăt hmâo pok pơhai mơn abih bang hơdôm grŭp anom bruă hlăk ai hơdôm bôh tơring glông, plơi prong. Hrŏm hăng anun ăt lĕ sa  glông tô nao rai hăng ƀing thâo tơngia. Hơdôm khul grŭp anom bruă khul hlăk ai tơring glông, plơi prong hmâo hơdôm anih anom tŭ mă gơnam. Abih bang hơdôm gơnam kiăng yua ƀơi plơi prong ăt kah hăng hơdôm tơring glông đing tum pơƀut ƀơi tơdrŏn lak. Mơ̆ng anun Grŭp apăn bruă Khul hlăk ai tơring čar tô nao rai hơdôm anom bruă dŭ pơgiăng gơnam brơi đôč nao pơ̆ neh wa kual Kơdư dêh čar pioh djru neh wa yak rơgao tơlơi tơnap”./.