VOV4.Jarai-Hơdôm hrơi hăng anai, tơlơi mơak čơkă hrơi akŏ pơdong kơnuk kơna lŏn ia lơ 2/9  hlăk kơdok kơdor amăng ƀơi djop plơi pla ala ƀôn amăng kual Dap Kơdư. Ƀơi ƀôn Phôk, să Ea Rƀin, tơring glông Lak, sa boh plơi kual ataih mơ̆ng tơring čar Dak Lak, hyơ hyơr hla kơ mriah pơtŭ kơññĭ đhơ đhet por ƀơi djop jơlan plơi. Ơi Y Ƀlorr Lưk, khua ƀôn Phôk, să Ea Rƀin brơi thâo, tơlơi mơak čơkă hrơi akŏ pơdong kơnuk kơna lŏn ia kiăng pơtă pơtăn kơ ană plơi pla hơdor kơ gru grua thâo gum pơgôp, kiăo tui jơlan ping gah, kơnuk kơna ta pơčrâo pioh man pơdong plơi pla jai hrơi pơdrong asah hiam rô̆.

‘’Mơta sa lĕ gơmơi pơtô lăi kơ mơnuih ƀôn sang brơi akă hla kơ kiăng hơdor kơ hrơi mơak akŏ pơdong kơnuk kơna lŏn ia lơ 2/9, tơlơi mơak prong biă mă. Ăt kah hăng rim thun mơ̆n djop boh sang akă yôl hla kơ soh. Gơmơi pơtô lăi ană plơi thâo hluh lu kơ boh yôm mơ̆ng Hrơi akŏ pơdong kơnuk kơna lŏn ia jing hrơi ngă yang mơak kơ djuai ania.

Hơdor tơngia kơ Wa Hồ laih anun ƀing mơnuih tuh drah pơčah asar djai drơi jăn yua kơ lŏn ai, ƀing hơmâo pran hơkrŭ kơ dêh čarr, mơnuih ƀôn sang kiăo tui jơlan hơdră ping gah kơnuk kơna. Ană plơi pla thâo gum pơgôp, sit jak iâu gum tơngan hrom yơh djru pơčruh keh prăk pioh kơ mơnuih ƀun rin, djru mơnuih hơmâo tơlơi truh lŏn adai ngă ƀudah djru mơnuih djơ̆ jrao hret, mơnuih ƀôn sang ngă hrom soh’’.

Ơi Đinh Đăm djuai ania Bahnar jing tha plơi plơi Kon Sơnglok, să Hà Đông, tơring glông Đak Đoa, Gia Lai. Ñu nao ngă tơhan ƀô̆ đô̆i mơ̆ng thun 1963, ơi Đinh Đăm ƀuh abih laih tơlơi răm ƀăm blah ngă ƀơi kual Dap Kơdư kơtang biă mă, lu adơi ayong, ling tơhan pơsăn drơi jăn kơ lŏn ia kiăng pơgang ba tơlơi rơnuk rơnua rơngai. Yua kơ anun, ơi Đinh Đăm pơdah pran jua hơdor tơngia na nao kơ Wa Hồ hơmâo git gai mơnuih ƀôn sang sua glăi tơlơi rơngai kơ djuai ania, tơlơi hyuk hyak mơak klă kah hăng ră anai:

‘’Wa Hồ lĕ mơnuih lăi pơthâo akŏ pơdong kơnuk kơna lŏn ia Việt Nam Dân chủ Cộgn hòa, ba glăi tơlơi hyuk hyak mơak klă kơ ană plơi pla. Yua hơmâo pơklaih rơngai, ngă tui tơlơi Wa Hồ pơtô, mơnuih ƀôn sang hok mơak biă mă, thâo gum pơgôp, gir run mă bruă, pơtô brơi bruă ngă hmua, hrăm nao rai tơdruă hơdră čem rông hlô mơnong, pla pơjing kiăng hơmâo boh tŭ yua lu.

Mơ̆ng hrơi pơklaih rơngai truh ră anai ƀuh lŏn ia pơblih lu biă mă. Hlâo adih ƀu hơmâo rơdêh thut oho, ră anai djop sang laih hơmâo rơdêh thut, rơdêh kai hmua. Kơnong să Hà Đông ră anai, hơmâo hơdôm boh rơdêh. Laih anun tivi lăng ngui, hơmâo hip rơ-ot, tơlơi hơdip mơda pơblih lu biă mă’’.

 Ƀơi kual guai dêh čar či tơring glông Tuy Đức, Dak Nông, hơdôm hrơi hăng anai, lăng hyu hyơ hyơr hla kơ dêh čar, hơdor glăi hrơi akŏ pơdong kơnuk kơna lŏn ia lơ 2/9. Ơi Y Thái, Kơ-iăng Khua git gai ping gah tơring glông Tuy Đức, brơi thâo, tơring glông hơmâo lu bruă hơkrŭ hing ang, jing plơi pla mơ̆ng pô khin hơtai djuai ania N’Trang Lơng git gai tal tơgŭ hơkrŭ blah ayăt Prang sua mă kual Dap Kơdư hơdôm akŏ thun rơnuk tal 19; hơmâo anih ngă hơkrŭ đưm Quảng Trực sa boh anih mriah amăng hơdrôm hră čih pioh ră ruai rơnuk blah Mi kiăng pơklaih rơngai lŏn ia. Djă pioh gru grua hơkrŭ, hơdôm thun rơgao, mơnuih ƀôn sang djuai ƀiă pơ Tuy Đức ăt thâo gum pơgôp djru nao rai pơđĭ kyar bơ wih ƀong huă. Ơi Y Thái brơi thâo:

‘’Hơdôm boh tơhnal dưi ngă laih, tơring glông hơmâo ngă hră pởtun kơ bruă mă pởhŏ ƀun rin hơđong kjăp amăng djop plơi pla mơnuih djuai ƀiă, amăng anun đing nao kơ bruă pơhrăm mơnuih mă bruă ngă tui lu hơdră pioh djru kơ tơring glông tơnap tap, hơdră  pơđĭ tui tơlơi hơdip mơda pran jua mơak kơ mơnuih ƀôn sang djuai ƀiă hăng hơdră man pơdong plơi pla phrâo kiăng pơtum tuh pơ alin brơi kơ  djop să ngă tui gêh găl hăng rim boh plơi pla, lir hơbit lu bruă ngă hrom.

Ping gah tơring glông pơpha bruă mă, jao tum teč rim čô mơnuih ping gah sem lăng, pơtrut ngă bruă, khom ngă tui sit nik tŭ yua, pơhlôm ngă tui bruă jao pởhŏ ƀun rin brơi kơ djop plơi pla”.

Nay Jek: Pơblang