Ơi Y Dhun Hmok, tha plơi buôn Dur 1 ăt dô̆ hơdor mơn hơdôm kơnuih mơ̆ng Khua git gai Ping gah dêh čar Nguyễn Phú Trọng lơm rai čuă hăng pơhmư̆ Hrơi jơnum Gum hrŏm hơbit djop djuai ania să Dur Kmăl, tơring glông Krông Ana, tơring čar Dak Lak lơm rơnuč thun 2018. Ñu ư-ang dưi pơ ala kơ neh wa plơi pla brơi kơ Khua git gai Ping gah dêh čar ao mơñam đưm gah djuai ania Êđê. Ơi Y Dhun Hmok hơdor glăi:

 “Wa lăi: Neh wa khom đing nao bruă ngă đang hmua kiăng pơđĭ dlông tơlơi hơdip mơda, ană bă lĕ khom hrăm hră lĕ tơlơi čang rơmang mơ̆ng Wa. Truh ră anai neh wa hmâo djop asơi huă añăm ƀong, băn ao buh dưi hrăm hră, anun lĕ tơlơi mơ-ak biă. Plơi pla lĕ pơplih phrâo. Neh wa amăng ƀôn lan bơni kơ pran jua dơlăm mơ̆ng Wa hmâo pioh laih kơ neh wa Dur Kmăl”.

Bơ̆ ơi Hmyet, Khua git gai Ping gah ngă rah Khua plơi Têng 2, să Tân Sơn, plơi prong Plei Ku, tơring čar Gia Lai, ăt dô̆ djă pioh mơn rŭp sa čô khua git gai lăng jê̆ giăm hăng ană plơi biă:

 “Thun 2011, Wa Nguyễn Phú Trọng hmâo nao čuă dua bôh plơi Jarai ƀing gơmơi pơ̆ să Ia Tiêm hăng să Ayun, tơring glông Čư̆ Sê. Neh wa ƀing gơmơi ƀuh wa jê̆ giăm hăng đing nao biă. Ñu lĕ mơnuih git gai tơpă hmâo git gai Ping gah ta kơdŏng glăi tơlơi hưp ƀong kông ngăn hmâo lu bôh tơhnal klă. Kâo hăng neh wa Jarai đăo kơnang gơnang kơ hmâo Ping gah mơ̆ng bruă bơwih ƀong mơnuih mơnam, tơlơi hơdip mơda mơ̆ng neh wa Dap Kơdư ƀing gơmơi amra pơplih klă hloh”.

Pơdah pran jua rơngôt hăng Khua git gai Ping gah Nguyễn Phú Trọng, ơi Bon Yô Soan, mơnuih arăng đăo kơnang ƀơi plơi prong Đà Lạt, tơring čar Lâm Đồng, pơdah pran đăo kơnang kơ bruă git gai pơdŏng lŏn ia mơ̆ng Ping gah:

"Bruă gơgrong kơdŏng pơgăng hưp ƀong kông ngăn, tơlơi ngă soh hăng mơnuih ping gah dưi hmâo ơi Nguyễn Phú Trọng ngă tui khut khăt ƀu hmâo kual kom. Ră anai, neh wa djuai ania ƀiă tơring čar Lâm Đồng hmư̆ tui đăo kơnang kơ tơlơi git gai mơ̆ng Ping gah”./.