Hăng mơnuih ƀôn sang djop djuai ania să Ayun, tơring glông Čư̆ Sê, tơring čar Gia Lai, Khua git gai ping gah ơi Nguyễn Phú Trọng ƀu kơnong sa čô khua git gai abih pran jua, tơlơi hơdip kơ mơnuih ƀôn sang đôč ôh, dŏ jing mơnuih ba brơi kơ mơnuih ƀôn sang tơlơi hơdip mơda trơi pơđao. Amăng tal nao čuă hăng mă bruă ƀơi tơring čar Gia Lai blan 4/2017, ơi Nguyễn Phú Trọng hơmâo nao čuă să Ayun sa boh să tơnap tap hloh ƀơi tơring glông Čư̆ Sê. Pơđing hmư̆ tơlơi kiăng, pran jua bơngơ̆t mơ̆ng ană plơi kiăng hơmâo bơnư̆ pơkong pling ia ngă hmua pơdai dua bơyan, Khua git gai ping gah pơčrâo trun, khua mua tơring čar, plơi pla khom pơtum anŏ gêh găl brơi man pơkra tañ bơnư̆ pơkong ia Plơi Keo. Dua thun tơdơi kơ anun, ring bruă bơnư̆ ia Plơi Keo hlong ngă giong mơtam, pơđoh ia mơ̆ng hnoh ia Ayun, pling glăi pơ hmua mơnuih ƀôn sang, hơmâo hmua ia dua bơyan, djru kơ ană plơi pla hơmâo pơdai, asơi huă trơi pơđao. Hơmâo laih bơnư̆ pơkong ia Plei Keo, mơnuih ƀôn sang să Ayun rah pơtem hmua pơdai 300 hektar dua bơyan, anun yơh tơlơi hơdip mơda mơnuih ƀôn sang hơđong. Tha plơi ơi Đinh Miơč, plơi Ačong, hơdor bơni na nao kơ bruă ngă yôm pơphăn mơ̆ng Khua git gai ping gah ơi Nguyễn Phú Trọng pioh kơ ană plơi pla pơ anai:

“Ană plơi pla gơmơi mơak biă mă, tơdơi kơ Khua git gai Ping gah ơi Nguyễn Phú Trọng pơčrâo trun djru kơ mơnuih ƀôn sang hơmâo bơnư̆ pơkong ia, ngă hmua pơdai dua bơyan tơlơi hơdip mơda đĭ tui. Gơmơi hơdor bơni biă mă pran jua mơ̆ng Wa anun pioh glăi kơ ană plơi Ayun ră anai hăng dĭ da gla kơñ”.

Rơbêh 10 thun hlâo anun, lơ 17/3/2014, Khua git gai Ping gah dêh čar ơi Nguyễn Phú Trọng hăng grup hyu mă bruă mơng gơnong glông hơmâo nao čuă neh met wa djop djuai ania ƀơi să Hồng Hạ, tơring glông A Lưới, tơring čar Thừa Thiên Huế, pel ĕp bruă man pơdong plơi pla phrâo, pơplih phun pla, hlô rông, pơklaih mơng ƀun rin. Pơhiăp bih hăng gong gai, mơnuih ƀôn sang ƀơi anai, Khua git gai Ping gah dêh čar pơtă pơtăn Ping gah, mơnuih ƀôn sang amăng să tŏ tui gru grua sông kơtang, pơjing plơi pla jai hrơi pơdrong asah hiam klă, anăm brơi rin rơpa dong tah. Ơi Hồ Viết Lương, Khua Jơnum min mơnuih ƀôn sang să Hồng Hạ hơdor glăi: Lơm anun, gong gai ƀon lan, neh met wa amăng să hmư̆ hing Khua git gai Ping gah dêh čar nao čuă hlơi hlơi lêng kơ hur har pran jua.

“Neh met wa kah kâo pô hơdor hloh tơlơi pơtă mơng Khua git gai Ping gah dêh čar anun lĕ mơnuih ƀôn sang Hồng Hạ tŏ tui gru grua plơi pla sông kơtang, gum pơgôp pơjing tơlơi hơdip trơi pơđao, yâo mơ-ak. Anăm brơi rin rơpa dong tah, hlơi hơdip klă gir hơdip klă ƀiă dong. Khua git gai Ping gah dêh čar rơngiă yơh, neh met wa hnong rơngŏt biă mă. Hrơi anai ƀơi sang Gươl yua Khua git gai Ping gah man pơdong brơi, mơnuih ƀôn sang rai rơmet pơagaih, pơbưp nao rai pioh hơ-ŭ hơdor kơ Khua git gai Ping gah hăng amra hơdor na nao kơ ñu”.