Mơguah sa hrơi akŏ rơwang hrơi tơjuh, ơi Bùi Đức Thanh, mơnuih ƀôn sang ƀơi plơi Tân Sao, să Ia Hrung, hơmâo ƀuh ƀô̆ mơta ƀơi anih nao ngă hră pơar kơnuk kơna ƀơi să, kiăng ngă hră pơar yua lŏn. Lŏn sang anŏ ñu hơmâo laih hră yua lŏn, samơ̆ yua soh glăi čih pơkă mơ̆ng lu thun hlâo adih, tơlơi dưi mă yua lŏn anun, ngă hră pơar čih djơ̆ anăn djơ̆ pô pơkŏn. Tal blung a ñu nao pơ să phrâo, tơdơi kơ čih pơkra glăi anăn hăng nao pơkă glăi guai lŏn sang, đang hmua, ơi Thanh arăng pơtô brơi bruă ngă hră pơar tong ten biă mă, ñu lăi:

“Ƀing khua mua, mơnuih apăn bruă kơnuk kơna ƀơi să mă bruă tŭ yua biă mă, bơwih brơi mơnuih ƀôn sang tong ten mơ̆n. Ƀing đah kơmơi ngă hră pơar dŏ amăng anih tŭ mă hră pơar, dŏ ber hrŏm ană plơi, pơčrâo brơi, lăi pơthâo, wơ̆t ƀing hlăk ai djru ngă hră pơar kơ ană plơi hơmâo pơtô brơi gơmơi thâo hluh. Hrơi anai, hră pơar kâo ngă ƀiă giong abih bang laih”.

Jing sa boh să lu mơnuih ƀôn sang djuai ƀiă, samơ̆ să Ia Hrung yap mrô tal 8/135 boh să phường amăng tơring čar Gia Lai, lăi nao kơ mrô hră pơar tŭ mă amăng sa wơ̆t hrơi tơjuh, lơ̆m phrâo pơphun mă bruă. Rơbêh 200 pok hră pơar tŭ mă hơmâo čih pơdưm amăng plăng ia rơgơi mrô soh. Mrô hră pơar mơ-it amăng plang internet ngă bruă mơ̆ng ataih hơmâo 3/4, brơi ƀuh mơnuih ƀôn sang ăt pơblih laih mơ̆n tơlơi juăt hăng bruă ngă mă, hră pơar tui anih mut ĕp, pơsir hră pơar kơnuk kơna amăng internet. Yă Huỳnh Ngô Tùng Điệp-Kơ-iăng khua jơnum min mơnuih ƀôn sang să, ngă rah khua anom bruă pơsir hră pơar kơnuk kơna ƀơi să Ia Hrung, brơi thâo:

“Pơtong rơđah, gong gai kơnuk kơna ƀơi tơring čar 2 gưl bơwih brơi kơ mơnuih ƀôn sang hăng djop sang bruă, ƀing ngă bruă mơdrô amăng să. Yua kơ anun tơlơi anai dưi hơmâo Jơnum min mơnuih ƀôn sang să pơtă pơtăn tong ten, ƀing apăn bruă kơnuk kơna khom ngă giong bruă mă amăng ha hrơi, huăi ngă kaih ôh. Bơhmutu, scan hră pơar pơdưm pơmut plang ia rơgơi mrô, ƀing apăn bruă kơnuk kơna ba yua măi telephôn rơgơi pioh ngă brơi hră pơar, anŏ hơgĕt hmar hloh lĕ ngă tui mơtam yơh”.

Hrŏm hăng să Ia Hrung, lu să pơkŏn kah hăng phường Plei Ku, phường Quy Nhơn să Phú Túc....ăt čih pioh lu mrô hră pơar mơnuih ƀôn sang ba nao, ngă hră rơkâo pơsir. Phường Thống Nhất ƀuh rơđah, dăp tal 5 đơ đam tơring čar tŭ mă lu hră pơar rơkâo pơsir laih anun pơglăi boh tơhnal laih pơsir mơ-it tui jơlan điện tử soh. Yă Lê thị Ánh Tuyết-anom bơwih brơi bruă ngă hră pơar kơ mơnuih ƀôn sang Phường Thống Nhất brơi thâo: mrô anăn hră pơar čih pơmut amăng anăn gru ia rơgơi mrô hăng pơglăi hră pơar anăn tui gru mrô lĕ tañ hăng hmar hloh pơsir brơi kơ mơnuih ƀôn sang, laih anun djru čih pioh pơtum glăi mrô rơnoh djă pioh hrŏm abih bang amăng tơring čar. Yua kơ anun, amăng tal pơsir bruă mă tŏ tui, mơnuih ƀôn sang ƀu tơguan nao ngă hră pơar hăng hră mơta ôh, yua kơ tơlơi pơhing hơmâo laih anun anăn amăng atur yua mrô amăng plang internet kơnuk kơna djă pioh anăn mơnuih ƀôn sang.

“Sang bruă hơmâo pơsit sa hơnơ̆ng lĕ, abih bang ƀing apăn bruă kơnuk kơna khom ngă djơ̆ akŏ klôn bruă mơ-it hră pơar mơ̆ng blung pơmut, dưm anăn amăng mrô, laih anun pơsir giong jao glăi kơ anih ba tơbiă anăn hră pơar, hnun kah čih pioh rơnoh hră pơar pơsir giong pơdưm amăng plang điện tử. Laih dơ̆ng, anih anom pơsir bruă ăt ngă hrŏm lu anih wai lăng hră pơar, bruă mă pơkŏn pơdjơ̆ nao, kiăng djru pơsir hĭ hruaih, hmao kru, pơsir tơlơi dŏ gun kơđông, tơnap tap amăng bruă pơsir hră pơar”.

Ră anai, khul amăng să, phường đơ đam tơring čar Gia Lai hlăk ngă tui 424 mơta hră pơar kơnuk kơna khom pơsir, lu hloh kơ hlâo adih dua wơ̆t, klâo wơ̆t mơtam. Hrơi blan pơ anăp, tơring čar him lăng ăt jao bruă mă, pơđĭ tui tơlơi glăm ba mơ̆ng gong gai să, plơi pla. Khul bruă mă khom pơsir rim hrơi amra lu hloh, anun kiăng ƀing apăn bruă kơnuk kơna gưl să, phường; khom thâo tong ten hơdră mă bruă, hơdră pơsir bruă kiăng hruaih, pơdưm anăn amăng mrô hăng thâo ba yua boh thâo ia gơgơi pơsir hră pơar kơ mơnuih ƀôn sang.

Tui hăng ơi Phạm Anh Tuấn, Kơ-iăng khua git gai ping gah, Khua Jơnum min mơnuih ƀôn sang tơring čar Gia Lai lăi, tơring čar kơtưn pơtô, pơhrăm brơi mơnuih ngă khua, apăn bruă thâo ba yua sa hơnơ̆ng ia rơgơi mrô, biă mă ñu ia rơgơi ba yua tơlơi pơhing djru kơ bruă mă tŭ yua hloh, kiăng ƀing apăn bruă dưi glăm ba bruă mă ia rơgơi rơnuk phrâo. Hăng ƀing apăn bruă pơ kual plơi pla, să, phường, Jơnum min mơnuih ƀôn sang tơring čar Gia Lai pơkă tơhnal bruă či ngă tui hăng tơlơi kiăng hnai:

“Tơlơi či kiăng djop bruă mă khom pơsir amăng tơhrơi. Lăng kơ mơnuih ƀôn sang hăng sang bruă mơdrô yơh phun, ngă anŏ đing nao pơsir bruă mă. Mơnuih ƀôn sang hăng sang bruă mơdrô lĕ kah hăng pô bơnah ngă bruă mơdrô hăng kơnuk kơna,  anun kah hăng ƀing ta khom pơmin ngă hiư̆m pă bơwih brơi bruă mă klă hloh? Anai yơh tơlơi hơkrŭ yom kơ lŏn ia, hơduah ĕp djop mơneč pioh ngă tui tŭ yua klă hiam hloh. Tơlơi kiăng lĕ ƀu dưi pơčrong kơdŭn glăi ôh, khom pơčrong ngă bruă đôč”.

Hơbô̆ bruă gưl să, phường ƀơi Gia Lai yak ngă blung a brơi ƀuh gong gai kơnuk kơna jai hrơi ngă bruă jĕ giăm ană plơi pla hăng pơsir bruă mă tañ hloh. Khă hnun, kiăng anăp nao kơ bruă mă pơsir hră pơar kơnuk kơna hăng ia rơgơi phrâo, amuñ gêh găl hloh kơ mơnuih ƀôn sang hăng sang bruă sĭ mơdrô lĕ, ăt khom ngă tui lu bruă, pơhlom djop atur boh thâo ia rơgơi či ba yua laih anun pơđĭ tui tơlơi thâo hluh, bruă mă beč bal hmar hloh hăng pran jua mă bruă mơ̆ng ƀing mơnuih apăn bruă ƀơi plơi pla khom yua kơ ană plơi pla yơh či mă bruă kơñ pơgi ni anăp.