
Hrơi tơjuh, mah hrơi pơdơi, mơnuih ƀôn sang plơi Ia Nueng, să Biển Hồ, plơi prong Plei Ku pơtum jơngum ƀơi sang rung plơi, pioh pơgôp hiăp kơ bruă dăp glăi anom bruă kơnuk kơna. Mơnuih ƀôn sang ƀuh ƀô̆ mơta pioh djru pơgôp hiăp brơi akŏ bruă dăp glăi sang bruă kơnuk kơna hơbôt hloh. Ơi Ksor Kroih, thun anai 64 thun, pơdah pran jua tŭ ư hăng jơlan hơdră pok prong tui să Biển Hồ, kơnang kơ bruă dăp glăi mơ̆ng hơdôm să Nghĩa Hưng, să Čư̆ Đang Ya, tơring glông Čư̆ Pah hăng să Hà Bầu tơring glông Đak Đoa, laih dơ̆ng lui hĭ bruă mă, khua mua gưl plơi prong, bơkơnar hăng tơring glông, jing plơi prong Plei Ku ră anai. Tui hăng ñu, anŏ pơblih phrâo anai djru mơnuih ƀôn sang pơsir hră pơar mơ̆ng kơnuk kơna amra tañ hloh. Khă tui anun, tơdơi kơ pơmut glăi, mrô mơnuih ƀôn sang djuai ania ƀiă amăng să phrâo lu hloh dua wơ̆t pơkă hăng hlâo, đĭ truh 47%, anun yơh amra pơđĭ tui mơ̆n mrô mơnuih apăn bruă gah djuai ƀiă, biă mă ñu amăng bruă mă gah tơlơi phiăn čih anăn wai lăng akŏ sang mơnuih mơnam, pioh djru mơnuih ƀôn sang klă hloh. Ơi Ksor Kroih brơi thâo:
"Ƀuh djơ̆ biă yơh, lui hĭ gưl anom bruă tong krah kah hăng gong jơlan đôč. Mơnuih ƀôn sang kiăng hơgĕt nao ngă bruă tơl anih ƀơi anăp mơtam, huăi gun gan ôh. Kiăng kơtưn hloh bruă mă brơi kơ mơnuih djru amăng bruă ngă hră pơar ƀơi să. Tơdah djuai ania jarai lĕ thâo hluh tơlơi Jarai hloh, djuai ania Yuan lĕ kơnong amăng hră pơar, samơ̆ ƀu thâo tơlơi pơhiăp djuai ania ƀiă tơnap mơ̆n. Kâo čang rơmang pơđĭ tui mrô mơnuih apăn bruă jing djuai ƀiă lu tui”.

Kiăng mă hiăp mơnuih ƀôn sang djru pơgôp hiăp tŭ yua hloh, gong gai kơnuk kơna plơi pla hăng djop khul grup mơnuih tơpuôl ƀơi să Biển Hồ hơmâo pok pơhai pơtô pơblang djop anih, tong ten hloh. Hră pơar phun hăng hră klah čun glăi akŏ bruă dăp bruă dưi čih pơthâo amăng bơnah tơlơi pơhing điện tử hăng čih pơtem lui ƀơi sang bruă plơi, sang rung...djru mơnuih ƀôn sang amuñ ƀiă nao ĕp lăng tơlơi pơhing djop. Rčom H’Myư̆ Khua Jơnum min djop djuai ania mơnuih mơnam să Biển Hồ brơi thâo: glông bruă pôr tơlơi pơhing plơi pla, wơ̆t hăng tơlơi pơhing mơnuih mơnam internet, plang facebook lêng kơ pôr tơlơi pơhing, bơwih brơi kơ bruă iâu pơtum ană plơi djru pơgôp hiăp tal anai:
“Rim hrơi, lơ̆m 5 mông 30 mơnit mơguah abih ha mơguah hăng tlam, mikrô pôr mơ̆ng să ăt pôr uang uang kơ ană plơi hmư̆. Lăi pơthâo, pơdah tơlơi pơhing amăng zalo hăgn facebook, jơnum min djop djuai ania să hơmâo pok pơhai brơi kơ abih bang khul ngă hrŏm amăng plơi pla thâo tong ten jơlan hơdră mơ̆ng kơnuk kơna lăi nao kơ bruă pơmut sang bruă, dăp glăi djop sang bruă kơnuk kơna tơring čar hăng plơi prong Plei Ku, ăt kah hăng djop să, phường. Ră anai, mơnuih ƀôn sang thâo hluh tong ten laih kơ bruă anai”.

Hrŏm hăng să Biển Hồ, djop sang bruă, anom bruă amăng tơring čar Gia Lai ăt pok pơhai mă hiăp djru pơgôp mơ̆ng mơnuih ruah khua lăi nao bruă dăp glăi sang bruă kơnuk kơna, pơmut glăi djop să. Hơdră pơphun bruă ngă tui djơ̆ găl, beč bal hloh, kah hăng yơr tơngan tŭ ư amăng mông jơnum pơhaih rơđah rơđong, ƀudah pơpha hră čih ba nao tơl sang hăng ƀing ruah khua ƀu dưi nao truh pơ anih jơnum. Hră čih anăn mơnuih ruah khua dưi jŭ yap tong ten, djop djel, ƀu dưi lui kơƀah sa čô ôh.
Hlâo kơ anun, ƀơi mông jơnum lok 19, khua mua apăn bruă ping gah tơring čar Gia Lai tal XVI pok pơhư prong, tơring čar Gia Lai tŭ ư jơlan hơdră pơhrŏ mơ̆ng 218 boh să, trun dŏ glăi 77 boh să. Tơdơi kơ mă hiăp mơnuih ƀôn sang pơgôp hrŏm, khua mua pơ ala mơnuih ƀôn sang gưl să hăng jơnum min djop djuai ania mơnuih mơnam ĕp lăng, pơƀut glăi, mơ-it đĭ kơ mông jơnum gưl tơring glông hăng gưl tơring čar sem glăi, pơsit amăng mông jơnum khua mua pơ ala mơnuih ƀôn sang gưl pơngŏ. Lơ̆m djop sang bruă kơnuk kơna phrâo laih pơmut hĭ giong, amra ngă tui hơdôm yak tŏ tui dơ̆ng kiăng pơgiong bruă ruah khua, pơđĭ bruă, đah mơ̆ng huăi tơ̆i dơnuai amăng bruă mă bơwih brơi kơ mơnuih ƀôn sang nao ngă hră pơar rim hrơi.
Viết bình luận