Kơčăo bruă čuk pơkra jơlan đuăi hmar Quy Nhơn-Plei Ku, dưi hơmâo Kơnuk kơna pơdah thâo laih anun khua mua pơ ala mơnuih ƀôn sang dêh čar pơsit bruă tuh pơ alin, sa tơlơi čang rơmang pok pơhai jơlan phrâo pioh pơtrut pơđĭ kyar bơwih ƀong huă mơnuih mơnam kơ hơdôm tơring čar amăng kual Dap Kơdư hăng kual Tong krah ter hang ia rơsĭ Dơnung Tong krah. Jơlan rơdêh đuăi hmar Quy Nhơn-Plei Ku hơmâo rơnoh glông ataih năng ai 125 km, anih tơkuh mơ̆ng jơlan 19B, ƀơi plơi prong An Nhơn, tơring čar Bình Định hăng pơđut truh pơ anih tơkuh gah tơdŭ ƀơi jơlan čơlah Hồ Chí Minh amăng plơi prong Plei Ku, tơring čar Gia Lai. Rơnoh prăk tuh pơ alin abih tih lĕ rơbêh 43.500 klai prăk; him lăng tơgŭ mă bruă amăng thun anai, khom čuk pơkra giong amăng thun 2029.

Kơčăo bruă rơdêh đuăi hmar Quy Nhơn-Plei Ku dưi čang rơmang ba glăi lu tơlơi pơblih phrâo hiam klă hăng kơtưn pơtruh nao rai amăng kual. Mơnuih ƀôn sang Gia Lai, ƀing ngă bruă mơdrô pơdŭ pơgiăng, hăng gong gai kơnuk kơna lêng kơ mơak soh, čang rơmang khua mua pơ ala mơnuih ƀôn sang dêh čar tañ pơsit hĭ kơčăo bruă anai, kiăng tuh pơ alin čuk pơkra djơ̆ hrơi blan thun pơkă, dưi pơsir anŏ kiăng pơtrut bơwih ƀong huă pơđĭ kyar amăng kual Dap Kơdư hăng kual ter hang ia rơsĭ Tong krah.