VOV4.Jarai - Amăng mông tŭ jum Grŭp Khua pơ ala mơnuih djru ngă hơkrŭ đưm tơring čar Daknông hăng plơi prong Tam Kỳ, tơring čar Quảng Nam mơng Ding jum wai lăng mơnuih mă bruă tơhan rơka ruă hăng mơnuih mơnam pơphun čơtlăm lơ 10/6, ƀơi Hà Nội, lu mơnuih djru ngă hơkrŭ đưm čang rơmang, bruă hyu hơduah ĕp, tum pơƀut tơlang ling tơhan pơsăn drơi hăng pơsit anăn păn plơi pla ling tơhan dô̆ kơƀah tơlơi lăi nao dưi pơtrut kơtang hloh dong.

Grŭp khua pơ ala mơnuih djru ngă hơkrŭ đưm čuă Hà Nội Ding jum wai lăng mơnuih mă bruă tơhan rơka ruă hăng mơnuih mơnam hơdor glăi 75 thun Hrơi pioh kơ ling tơhan pơsăn drơi 27/7

Amăng mông tŭ jum, mơnuih pơ ala kơ mơnuih djru ngă hơkrŭ đưm tơring čar Daknông hăng plơi prong Tam Kỳ, tơring čar Quảng Nam pơsit: Hơdră bruă djru mơnuih gum ngă hơkrŭ đưm dưi hmâo Ping gah hăng Kơnuk kơna lăng ba hlâo. Khă hnun hai, sa amăng hơdôm tơlơi mơ̆ mơnuih djru ngă hơkrŭ đưm dô̆ pơmin, anun lĕ bruă hyu hơduah ĕp, tum pơƀut tơlang tơhan pơsăn drơi hăng pơsit anăn păn plơi pla dô̆ kơƀah tơlơi lăi nao mơn, khom pơtrut kơtang hloh dong. Pơhiăp amăng mông tŭ ju, Kơ-iăng Khua Ding jum wai lăng mơnuih mă bruă tơhan rơka ruă hăng mơnuih mơnam Nguyễn Bá Hoan pơsit, hăng hơdôm tơlơi gun amăng pơsir hră pơ-ar dô̆ glăi mơnuih djru ngă hơkrŭ đưm; bruă hyu hơduah ĕp, tum pơƀut tơlan tơhan pơsăn drơi hăng pơsit anăn păn plơi pla tơhan pơsăn drơi dô̆ kơƀah tơlơi pơhing lĕ khă tơnap tơnap dơ̆ hơpă ăt khom ngă dong mơn./.

Siu H’ Prăk: Pơblang