Rơbêh 1 blan anai, hơdôm hrơi rơnuč rơwang hrơi tơjuh, ƀơi Sang bơwih bơwang djru brơi djop mơta să Hàm Thuận, tơring čar Lâm Đồng, grup adôh suang mơnuih ƀôn sang hăng ƀing ngui buh eng ao djuai ania Chăm lêng kơ hur har pran jua pơtop hrăm. Ayong Thông Đinh Đương brơi thâo, anai lĕ tal blung a ñu mut hrŏm hrơi ngui gru grua djuai ania Chăm đơ đam dêh čar, ñu pô pơ-ư ang biă mă hăng hur har pran jua: “Anai ƀu djơ̆ kơnong lĕ sa hrơi ngui pơprong đôč ôh mơ̆ ăt lĕ anih kiăng ƀing gơmơi dưi gum tơngan hrŏm kiăng kơ lăi pơthâo gru grua, anŏ yôm phar djuai ania Chăm gơmơi brơi abih bang mơnuih thâo. Pơpŭ bơni biă mă Ping gah hăng Kơnuk kơna hơmâo ngă gêh gal kiăng mơnuih djuai ania Chăm djop anih đơ đam dêh čar dưi pơtum pơƀut, pơtrut pran ngui gru brơi ƀing hlăk ai kơñ pơgi dong, amăng bruă djă pioh, lăi pơthâo gru grua djuai ania Chăm. Kâo kah hăng abih bang mơnuih amăng grup ngui adôh suang glăk gir run pơtop hrăm, čang rơmang amra hơmâo hơdôm tơlơi ngui mơ-ak hloh pơƀuh brơi neh met wa”.

Hăng anăn mă yua amăng Hrơi ngui lĕ “Djă pioh, lăi pơthâo gru grua djuai ania Chăm tơring čar Lâm Đồng amăng rơwang phrâo”, grup Lâm Đồng amra mut hrŏm lu tơhnal phara kiăng lăi pơthâo dơlăm ƀiă gru grua djuai ania Chăm glăk hơmâo mơnuih ƀôn sang djă pioh. Amăng anun, bruă ngă gru grua đing nao hơdôm boh tơhnal anun lĕ ngui ngor, lăi pơthâo hơdôm črăn amăng hrơi ngui ngor, hơdôm hơdră ngui ngă yang gru grua djuai ania Chăm; pơdă prưng, lăi pơthâo gru grua djuai ania Chăm amăng bruă pơjing hăng wai pơgang plơi pla. Laih dong, hơmâo bruă pơƀuh, lăi pơthâo bruă pơkra gơnam gru grua anun lĕ mơñam mrai, pơkra gô̆ lŏn mơng djuai ania Chăm; ngui adôh suang mơnuih ƀôn sang hăng ngui buh eng ao djuai ania Chăm.

Mơnuih kơhnâo kơhnăk Lâm Tấn Bình dŏ amăng să Bắc Bình brơi thâo, amăng hrơi ngui ngor, grup ngui pơƀuh brơi, lăi pơthâo hơdôm črăn amăng hrơi ngui ngă yang, tơlơi ngă yang “Ruah đĭ pô ngă akŏ prong hloh gah djuai Kadhar đăo Bàlamôn mơng djuai ania Chăm Lâm Đồng”. Anai lĕ tơlơi ngui ngă yang pơprong: “Tơlơi ngă yang ruah đĭ pô ngă akŏ prong hloh gah djuai Kadhar lĕ hrơi mông pơtum pơƀut tơlơi ngă yang đưm djuai ania Chăm pơƀuh djop gru grua yôm phara hluai tui hơdôm tơlơi ngă yang hăng hơdôm tơlơi adôh mơ-ak tui djuai Gru Kadhar, pơmut hrŏm hăng tơlơi iâu lăi mơng Muk Pajuw kiăng pơpŭ brơi tơlơi gum pơgôp, lăi pơthâo ƀing ơi pơtâo hơmâo arăng lăng kar mơyang, mơng hơdôm jua gông brô̆ mơng kơñĭ kanyi, ba glăi er mơñĭ hmư̆ glưh pran jua hăng ngă mơ-ak brơi hrơi ngui ngă yang amăng plơi pla…”

Rơngiao kơ hơdôm gru grua sô hơđăp, tơlơi adôh suang, ngui bơrơguăt drơi jăn, grup Lâm Đồng ăt mut hrŏm anih pơdă prưng, lăi pơthâo gru grua ƀôn lan, pơƀuh rơđah rup rap djuai ania Chăm ƀơi Lâm Đồng amăng bruă pơjing hăng wai pơgang plơi pla; anih sô hơđăp, anih hiam, hơdôm tơlơi ngui ngă yang; lăi pơthâo hơdôm gơnam sô hơđăp gru grua mơng kơnung djuai pơtao Chăm…

Sit biă ñu, grup amra lăi pơthâo sa, dua anih nao ngui mơ-ak amăng tơring čar Lâm Đồng, lăi pơthâo sa, dua gơnam đang hmua, gơnam OCOP ba gru…Ơi Nguyễn Tú Long, kơ-iăng Khua anom bruă gru grua hăng wai lăng kual amăng rơ-ưng Dak Nông-tơring čar Lâm Đồng brơi thâo, grup hơmâo 85 čô mơnuih mut hrŏm hrơi ngui hăng pran jua nao ngui hrŏm, nao pơhrăm kiăng pơđĭ kyar hrŏm: “Ră anai bruă prap lui năng ai ñu giong laih. Lăi biă ñu jơlan hơdră ngui mơng gơmơi djă ba gru grua djuai ania Chăm. Thun anai. Thun anai lu hloh lĕ mơng Hàm Thuận Bắc (hơđăp) hơmâo ƀing đă boh lông, ngui bơrơguăt drơi jăn, ƀing ngui adôh suang amăng mut hrŏm amăng hơdôm mông ngui adôh suang hăng ngui buh eng ao hiam. Kơnong kơ tơlơi ngă yang lĕ ƀing kŏm drơi jăn tui đăo mơng Bắc Bình (hơđăp).

Hrơi ngui gru grua djuai ania Chăm tal VI ƀơi tơring čar Khánh Hòa amra pơphun dong mơng lơ 26 truh lơ 28/6 pơ anăp, anai lĕ anih pơtum pơƀut gru grua djuai ania Chăm amăng đơ đam dêh čar. Hrơi ngui pơtum pơƀut rơbêh 700 čô mơnuih kơhnâo, mơnuih ngui adôh suang, ngui bơrơguăt drơi jăn mơnuih ƀôn sang rai mơng 7 boh tơring čar, plơi prong hơmâo: Khánh Hòa, Gia Lai, Lâm Đồng, Tây Ninh, An Giang, Dak Lak hăng ƀôn prong Hồ Chí Minh.

Hrŏm hăng Khánh Hòa, Lâm Đồng lĕ tơring čar hơmâo lu mơnuih djuai ania Chăm hloh amăng đơ đam dêh čar. Amăng hrơi blan rơgao, bruă djă pioh, lăi pơthâo anŏ yôm gru grua hiam klă mơng djop djuai ania lêng hơmâo ƀon lan đing nao. Hăng pran jua pơbưp nao rai, pơhrăm tơdruă, hrưn đĭ pran thâo hluh, tơlơi glăm ba mơng mơnuih ƀôn sang amăng bruă djă pioh, lăi pơthâo anŏ yôm gru grua amăng rơnuk mut hrŏm hăng pơđĭ kyar lŏn ia, ƀing mơnuih nao ngui hrŏm hăng ƀing kơhnâo djuai ania Chăm tơring čar Lâm Đồng glăk ječ ameč pơtop hrăm hăng glăk dŏ tơguăn truh hrơi ngui gru grua mơ-ak mơng djuai ania pô./.