VOV4.Jarai - Rơwang hrơi tơjuh rơgao, ƀơi Hà Nội, Ding jum đang hmua hăng pơđĭ kyar ƀôn sang dêh čar ta pơphun jơnum lăng nao rai mơng ataih đơ đam dêh čar lăi pơthâo Tơlơi pơtrun pơsit mrô 19 mơng Grŭp mă bruă Ping gah dêh čar ta tal 13 kơ bruă đang hmua, mơnuih ngă đang hmua, plơi pla rơwang truh thun 2030, tơhnal lăng truh thun 2045. Pơhiăp amăng mông jơnum, Khua Ding jum đang hmua hăng pơđĭ kyar ƀôn lan dêh čat ta ơi Lê Minh Hoan lăi rơđah: Mơnuih ngă đang hmua khom pô amăng tơlơi rô nao rai kơplah wah bruă đang hmua – mơnuih ngă đang hmua – plơi pla.

Ngă tui Tơlơi pơtrun pơsit kơ bruă đang hmua, mơnuih ngă đang hmua, plơi pla hăng Bruă pơđĭ kyar bruă đang hmua hăng plơi pla kơjăp phik, hơdôm hrơi rơgao, Ding jum đang hmua hăng pơđĭ kyar ƀôn lan dêh čar gum hrom hăng Grŭp pơtô bruă Ping gah dêh čar, Grŭp wai lăng bruă bơwih ƀong dêh čar ta, pơphun pơhrăm, lăi pơthâo, pơblang Tơlơi pơtrun pơsit. Hơdôm tơlơi gum pơhiăp amăng mông jơnum hmâo lăi pơthâo laih hơdôm tơlơi găn rơgao, hơdôm hơdră phrâo, bôh tơhnal amăng pơđĭ kyar bruă đang hmua, mơnuih ngă đang hmua, plơi pla kiăng anăp nao truh tơhnal pơkă pơdŏng “Bruă đang hmua dlai tlô, plơi pla phrâo rơnuk anai, mơnuih ngă đang hmua tui hơdră phrâo”. Ơi Nguyễn Hồng Sơn, Khua Anom kơsem min bôh thâo bruă đang hmua Việt Nam lăi lĕ:

“Bruă đang hmua, mơnuih ngă đang hmua hăng plơi pla hmâo tơlơi rô nao rai klă tơdruă. Pơđĭ kyar bruă đang hmua ăt lĕ ngă gal brơi pioh pơđĭ kyar mơnuih ngă đang hmua hăng plơi pla hăng kơđai glăi. Amăng Tơlơi pơtrun pơsit hăng bruă mă hmâo črâo rơđah, bôh thâo phrâo hăng hơdră phrâo măi mok ƀu djơ̆ kơnong kơ hmâo bruă mă ngă rai gơnam tam hmâo nua yôm, pơjing jơlan pơplih phrâo ôh mơ̆ ñu dô̆ hmâo bruă mă yôm phăn hloh anun lĕ pơtô juăt anom bruă bơdjơ̆ nao hăng anom bơwih ƀong pơphun ngă tui pơtô glăi bôh thâo phrâo măi mok ăt kah hăng pơtô juăt mơnuih ngă đang hmua tui jơlan gah dơlăm hloh pioh pơtrut kơtang bruă mă yua bôh thâo phrâo măi mok amăng ngă đang hmua, mơng anun đĭ tui nua gơnam ngă rai amăng bruă đang hmua”.

Daklak ngă pơhư̆č tuh pơplai pơđĭ kyar bruă đang hmua kơjăp phik

Phrâo tom adih anai, amăng rơwang “Jơnum ngui Sầu riêng Krông Pač tal I – 2022, Jơnum min mơnuih ƀôn sang tơring glông Krông Pač, tơring čar Daklak hmâo pơphun “Jơnum pơtrut iâu pơthưr tuh pơplai hăng pơđĭ kyar gơnam mă mơng đang hmua, bruă đang hmua kơjăp phik thun 2022”. Pơhiăp amăng mông jơnum, ơi Trần Hồng Tiến, Khua git gai Ping gah tơring glông Krông Pač brơi thâo, tơring glông hmâo rơbêh kơ 53.000 ektar đang hmua, 6.100 ektar ia juăt yua, anai lĕ anô̆ gal pioh tơring glông ngă pơhư̆č tuh pơplai amăng bruă đang hmua. Tơhnal gal amăng bruă đang hmua mơng tơring glông dô̆ prong biă. Yua anun, tơring glông čang rơmang ngă pơhư̆č dong prăk tuh pơplai, djru pơtrut bơwih ƀong - mơnuih mơnam pơđĭ kyar.

“Ƀing gơmơi amra djru brơi hơdôm bôh anom bơwih ƀong kơ bruă ngă hră pơ-ar kiăng hơdôm bôh anom bơwih ƀong ngă hră pơ-ar tañ hloh, klă hloh. Dua lĕ, ƀing gơmơi ăt črâo ba laih hơdôm anih anom lom mơnuih tuh pơplai kơ ƀing gơmơi amra djru klă hloh kơ pơsir anih anom mă yua lom ƀing tuh pơplai pơsit hăng tơring glông ƀing gơmơi kiăng tuh pơplai. Hăng khua git gai tơring glông ƀing gơmơi amra gum hrom hăng mơnuih tuh pơplai lom hơduah ĕp tuh pơplai ƀơi plơi pla”.

Khua Ding jum đang hmua hăng pơđĭ kyar ƀôn lan dêh čar ơi Lê Minh Hoan pơhiăp amăng mông jơnum

Mơng bôh nik ƀơi tơring glông, ơi Cao Văn Cường, Khua Gơnong bruă đang hmua hăng pơđĭ kyar ƀôn lan tơring čar Thanh Hoá brơi thâo:

“Hơdôm Ding jum, gơnong bruă dêh čar ta hmao mă yua laih hơdôm hră pơ-ar, rơkâo Ding jum tañ lăi pơthâo kơ Khua dêh čar mă yua Jơlan hơdră mă bruă, lom hmâo jơlan hơdră mă bruă lĕ hơdôm bôh tơring čar, ƀôn prong amra kiăo tui djơ̆ kiăng pok pơhai bruă mă amăng đơ đam dêh čar ta, djơ̆ hăng tơlơi dưi mơng rim tơring čar. Tañ mă yua Tơlơi pơtrun pơkă 57 kơ pơtrut pơsur anom bơwih ƀong tuh pơplai kơ bruă đang hmua mơnuih ngă đang hmua plơi pla, hluai tui anun Sơn La amra hmâo Tơlơi pơtrun pơsit djơ̆ hăng tơlơi kiăng, pơtrut anom bơwih ƀong tuh pơplai kơ bruă đang hmua, mơnuih ngă đang hmua, plơi pla”.

Pơhiăp amăng mông jơnum lăng nao rai mơng ataih đơ đam dêh čar lăi pơthâo” Tơlơi pơtrun pơsit mrô 19 mơng Grŭp mă bruă Ping gah dêh čar ta tal 13 kơ bruă đang hmua, mơnuih ngă đang hmua, plơi pla rơwang truh thun 2030, Khua Ding jum đang hmua hăng pơđĭ kyar ƀôn lan dêh čar ta Lê Minh Hoan lăi rơđah: Amăng tơlơi rô nao rai kơplah wah bruă đang hmua, mơnuih ngă đang hmua, plơi pla khom pơsit rơđah bruă mă, anih gơgrong pô ngă đang hmua măng pơsir truh kih mơng pơđĭ kyar bruă đang hmua, plơi pla. Hơdôm bôh anom gah Ding jum hăng Gơnong bruă đang hmua hăng pơpđĭ kyar ƀôn lan hơdôm tơring čar, ƀôn prong lăi pơthâo, ngă tui bruă jao, jơlan gah pơsir mơng Bruă pơđĭ kyar bruă đang hmua kơjăp phik hăng hơdôm jơlan hơdră bruă mă rơđah kiăng ngă tui Tơlơi pơtrun pơsit kơ bruă đang hmua, mơnuih ngă đang hmua, plơi pla:

 Jơlan hơdră mă bruă kiăng pơplih phrâo bruă Kơnuk kơna kiăng ngă tui Tơlơi pơtrun pơsit. Tơlơi pơtrun pơsit ƀudah Bruă mă ƀu djơ̆ tơhnal pơkă ôh mơ̆ anun lĕ bruă dŏng amăng bruă mă. Kiăng dưi ngă tui anai, hơdôm bôh anom mơng Ding jum hăng tơring čar, ƀôn prong khom ngă tui khut khăt amăng pok pơhai, hăng pơplih phrâo tơlơi pơmin amăng hơdră ngă juăt”.

Bruă đang hmua amăng lu thun dưi bâo nao truh kah hăng phun pơđôp mơng bruă bơwih ƀong. Bôh than amăng bruă đang hmua, mơnuih ngă đang hmua, plơi pla hmâo djru kơ hơdôm bôh than prong, hmâo bôh tŭ yua gru grua mơng tơlơi pơplih phrâo hmâo laih amăng hơdôm hrơi rơgao. Hơdră pơtrun anăp nao bruă đang hmua dlai tlô, plơi pla rơnuk anai, mơnuih ngă đang hmua thâo rơgơi mơ̆ Jơnum tal 13 ba tơbiă, khom kơtưn dong lu hơdră pơtrun, hơdră bruă, jơlan pơsir kơtang kah mơng pioh pơtrut tơlơi pơđĭ kyar mơng bruă đang hmua, mơnuih ngă đang hmua, plơi pla./.

VOV Tây Nguyên: Čih ruah mă – Siu H’ Prăk: Pơblang