VOV4.Jarai-Mơnuih ngă hmua hăng sang bruă mơdrô amăng kual Dap Kơdư hlăk ngă hrom pơjing rai hơdôm kual pla boh troh hiam jơman, čih anăn gru kơnăl pla pơjing rơgoh hơdjă, kiăng hơmâo gơnam sĭ mơdrô hiam bơkơnar soh. Hơdră ngă anai,  hlăk ba glăi boh tŭ yua kơ mơnuih ngă hmua hăng sang bruă sĭ mơdrô ba nao gơnam pơ dêh čar tač rơngiao, pơtrut bruă ngă hmua tui hơbô̆ phrâo, pơđĭ rơnoh yôm sĭ mơdrô hơđong kjăp.

Tơring čar Lâm Đồng ră anai hơmâo năng ai 10 rơbâo ha đang sầu riêng laih anun anai jing gơnam sĭ mơdrô mơ̆ng đang hmua, boh troh nua pơmă ƀơi tơring čar. Ơi Võ Hưũ Long-Khua kông ty mơnuih ƀôn sang ngă pô pơkra ming sĭ mơdrô Long Thủy, să Lộc An, tơring glông Bảo Lâm, tơring čar Lâm Đồng brơi thâo, anih anom sĭ mơdrô hăng ba nao boh sầu riêng ră anai hơđong laih, samơ̆ rơnoh sĭ mơdrô djuai boh troh jơman anai sĭ pơmă tui hăng hơđong lơ̆m kual pla dưi čih anăn hơmâo gru mrô kơnăl, tơpă, rơđah rơđong pla djơ̆, wai lăng tong ten, pĕ boh, răk lui hăng dưm amăng hruh djơ̆ anŏ pơkă hơdjă soh.

Biă mă ñu, hăng bruă mă yua gru mrô kual pla pơjing, sang bruă sĭ mơdrô hơmâo sĭ mơdrô djơ̆ jơlan phun hăng ba glăi boh tơhnal tŭ yua kơ mơnuih ngă hmua pla pơjing hăng sang bruă sĭ mơdrô:

"Mrô kơnăl anih pla hơmâo pơ anăn brơi laih, VietGap djop laih, lơ̆m ta ƀuăn ngă djơ̆, hơmâo hră brơi sĭ mơdrô lĕ rơnoh sĭ mơdrô pơkă hăng anih anom sĭ mơdrô tơđar pơmă hloh mơ̆ng 15 rơbâo truh 20 rơbâo prăk. Hăng đơ đam pla hơmâo pơsit gru kơnăl, ngă hrom amăng bruă sĭ mơdrô ta wai lăng laih, phrâo anai gơmơi hơmâo kĭ 6000 tơn laih”.

Kual ngă hmua pla boh hơmâo mrô gru kơnăl ngă tui hơdră pla pơjing hơdjă rơgoh ba glăi boh tŭ yua lu kơ mơnuih ngă hmua hăng sang bruă sĭ mơdrô hăng tač rơngiao ƀơi kual Dap Kơdư

Akŏ pơjing anih pla ngă djơ̆ tơlơi pơlir hrom ăt hlăk pơtrut lu mơnuih ngă hmua ƀơi tơring čar Dak Nông hăng lu mơta boh troh kah hăng Sầu Riêng, boh kruăi hrĕ, boh pơ-ô̆ yuan, boh ƀơr. Lu kual pla amăng tơring čar ăt hơmâo dưm brơi mrô kơnăl anih ngă hmua pla pơjing pioh bơwih brơi kơ bruă sĭ mơdrô pơ tač rơngiao.

Ơi Bùi Phú Tôn, Khua kông ty mơnuih ƀôn sang ngă pô sĭ mơdrô hăng dêh čar tač rơngiao Nghiệp Xuân, să Dak Nia, plơi prong Gia Nghĩa, tơring čar Dak Nông brơi thâo, hăng bruă ngă lir hơbit sĭ mơdrô, djop mơta gơnam boh troh đang hmua mơ̆ng kông ty hơmâo boh tŭ yua yôm, rơnoh sĭ mơdrô pơmă sit ba nao pơ dêh čar tač rơngiao:

“Anih anom sĭ mơdrô kiăng lĕ ta ba nao sĭ mơdrô jơlan phun. Sĭ mơdrô djơ̆ jơlan phun lĕ, khom hơmâo hră pơar čih anăn gru kơnăl anih pla, anih dưm amăng hruh tui hnong pơkă djơ̆ lăp, hnun kah arăng ư, ƀu dưi ba sĭ mơdrô tui jơlan anet, jơlan amur amrĕ kah hăng hơđăp dơ̆ng tah”.

Yă Nguyễn Thị Tình, Kơ-iăng Khua Gơnong bruă Ngă hmua hăng Pơđĭ kyar plơi pla tơring čar Dak Nông brơi thâo, truh ră anai, Anom bruă pơgang phun pla hơmâo brơi kơ 38 mrô gru kơnăl kual pla hăng sang dưm boh troh amăng kơdŭng hơdjă. Kiăng dưi ngă djơ̆ tơhnal pơkă hơmâo mrô gru kơnăl anih pla, sang bruă sĭ mơdrô lĕ mơnuih ngă hmua khom pơblih hơdră ngă hmua, sem lăng boh tŭ yua, biă mă ñu pel ĕp arong aruač ngă sat kơ boh troh.

Hăng bruă pơsit brơi mrô kơnăl anih pla, hmua đang hơđong amăng tơring čar,  dưi ba sĭ mơdrô pơ anih tui jơlan phun kĭ hră pơar ba gơnam lu sĭ mơdrô truh pơ hơdôm dêh čar pơprong, rơnoh sĭ ăt pơmă mơ̆n. Jing tơring čar hơmâo tơlơi bơwih ƀong huă ngă hmua prong, gêh găl Dak Nông hlăk pơtum pơtrut bruă pơđĭ kyar ngă hrom rơnoh sĭ mơdrô hăng kual lŏn pla hơmâo mrô gru kơnăl sit nik:

“Kiăng akŏ pơjing kual pla hơđong lir hơbit hăng bruă ngă gum hrom, pioh pơjing sa kual pioh pla boh troh dơnong sĭ mơdrô laih anun pơhlôm hơdjă, rơgoh, pơčrâo rơđah anih pla, phun tơdŭ ngă bruă. Anŏ yôm ñu mơ̆ng kual lŏn pla lĕ arăng thâo krăn boh troh pơ anun pla pơpă, hlơi pô pla, ngă tui hơdră hơgĕt, dưi pơhlôm hơdjă mơ̆n hă. Amăng tơring čar yap mơ̆ng khua mua ping gah truh kơ khua tơring čar hơmâo lu hră pơtrun git gai kơ bruă anai.

Boh yôm phun dăp glăi, pơblih pla boh troh, ngă đang hmua, pơtong glăi ba bruă lir hơbit pơjing rai kual pla sa hnong hơđong kjăp dơnong kơ pioh sĭ mơdrô tui ia rơgơi tơlơi kơhnâo ngă rơgoh hơdjă pơ anăp adih, hnun kah sĭ mơdrô arăng blơi lu”.

Kual pla pơjing hơmâo gru kơnăl hăng hơdră pla pơjing kjăp hơđong, boh troh anăp nao ngă hơdjă rơgoh huăi hơmâo ia jrao, hơdră anai ba glăi boh tŭ yua kơ mơnuih ngă hmua laih anun sang bruă sĭ mơdrô boh troh đang hmua ƀơi kual Dap Kơdư. Tơlơi anai, hlăk pơphun ngă dưi hơmâo lu tơring čar, plơi pla gleng nao pơđĭ kyar, kiăng ba gơnam sĭ mơdrô boh troh đang hmua dưi truh pơ djop dêh čar rŏng lŏn tơnah.

Công Bắc pô čih-Nay Jek: Pơblang